Britania e Madhe donacione për Policinë Kufitare
Nga OraNews Përditësimi i fundit 27 Tetor 2025, 14:59
Zyra e Operacioneve Ndërkombëtare e Ministrisë së Brendshme të Britanisë së Madhe i dhuroi Policisë së Shtetit disa pajisje për Policinë Kufitare.
Në ceremoninë formale të nënshkrimit dhe dorëzimit të donacionit morën pjesë drejtori i përgjithshëm i Policisë së Shtetit, Ilir Proda, menaxheri Ndërkombëtar Ndërlidhës nga Zyra e Operacioneve Ndërkombëtare, Stephen Law, si dhe drejtues të tjerë të Policisë së Shtetit.
Në fjalën e mbajtur gjatë ceremonisë, Proda falënderoi Zyrën e Operacioneve Ndërkombëtare dhe Ministrinë e Brendshme të Britanisë së Madhe, për mbështetjen e vazhdueshme për strukturat e Policisë së Shtetit.
Proda theksoi se kjo mbështetje është dëshmi e vijimit të bashkëpunimit të suksesshëm me partnerët britanikë, dhe se kontributi është i një rëndësie të veçantë për forcimin e kapaciteteve logjistike për Policinë e Shtetit shqiptar dhe kryesisht të strukturave të cilave iu adresohet.
Ndërkaq, Law, gjatë ceremonisë, tha se “është kënaqësi të jem këtu, në emër të HOIO. Gjithashtu, është kënaqësi që të realizojmë donacione të tilla për Policinë e Shtetit shqiptar. Bashkëpunimi me ju është i një rëndësie të veçantë për ne.
Ndihem krenar që mundëm të mbështetnim Njësinë Speciale për Kufirin dhe Migracionin “Delta”, Vlorë, për rimobilimin e ambienteve, si dhe për pajisjen me teknologji bashkëkohore. Gjithashtu, që mundëm të vëmë në dispozicion të Njësisë së Informacionit për Pasagjerin, ekrane me parametra të lartë”.
Donacioni përfshin përmirësimin e ambienteve të Njësisë Speciale për Kufirin dhe Migracionin “Delta”, Vlorë, si dhe 1 automjet në funksion të punës së kësaj Njësie.
Gjithashtu, përfshin 4 dylbi termike multispektrale dhe 7 ekrane me parametra të lartë teknologjike që do t’i vihen në funksion Policisë Kufitare dhe Njësisë së Informacionit për Pasagjerin.
