Vr*u me thi*ë kushëririn në Klos, Gjykata e Dibrës cakton arrest në burg për Hazbi Velsulën
Nga OraNews Përditësimi i fundit 13 Qershor 2025, 16:18
DIBËR- Gjykata e Dibrës ka caktuar masën e sigurisë "arrest në burg" për Hazbi Velsulën, i cili vrau me thikë kushëririn e tij, Selim Velsulën.
Ngjarja e rëndë ndodhi pasditen e 10 qershorit në fshatin Xibër – Murrize të Bashkisë së Klosit.
Viktima ka qenë duke kullotur lopën në një livadh afër banesës teksa është konfliktuar me autorin e dyshuar.
Nga dëshmitë e banorëve, mësohet se viktima është pikasur nga të afërmit teksa kanë qenë duke u kthyer për në banesë.
Ai është gjetur i shtrirë në rrugë pa shenja jete, ndërsa kishte plagë të shkaktuara nga një mjet prerës.
Të afërmit kanë njoftuar policinë e cila ka mbërritur në vendin e ngjarjes.
Ndërkohë, bashkëshortja e Selimit, Shpresa dhe vajza e tij Elida thonë se nuk kanë patur asnjë konflikt me familjen e autorit të dyshuar.
Ata shprehen se vrasja ka qenë e qëllimshme dhe se autori ka ardhur nga Tirana për ta kryer.
Në deklaratat e thyre ata kanë kërkuar drejtësi nga shteti, në të kundërt do të bëjnë vetëgjyqësi e nuk e falin gjakun e babait.
Autori i dyshuar i vrasjes, 31-vjeçari Hazbi Velsula u arrestua pak orë më vonë në banesën e vëllait të tij në Allias të Tiranës.
