Rrëmbimi dhe zhdukja e Jan Prengës/ GJKKO rrëzon kërkesën e Festim Bexhdilit për pamjet filmike, shtyhet seanca

Nga OraNews Përditësimi i fundit 13 Qershor 2025, 10:18

GJKKO ka rrëzuar kërkesën e avokatit mbrojtës të të pandehurit Festim Bexhdili, për të shfaqur në sallën e gjyqit pamjet filmike të kompleksit “Golden”. Bëhet me dije se mbrojtja e tëpandehurit pretendon se pamjet do të ndihmonin në zbardhjen e të vërtetës për ngjarjen e rëndë të rrëmbimit dhe zhdukjes së Jan Prengës.

Sipas avokatit, pamjet janë interpretuar në mënyrë të gabuar nga SPAK, dhe kërkoi që ato të shfaqeshin në gjykatë, në mënyrë që të qartësohej roli i klientit të tij. Bëhet me dije se gjykata nuk pranoi kërkesën, duke mbështetur qëndrimin e prokurorisë.

Procesi gjyqësor ndaj Bexhdilit vazhdon, ndërkohë që mbrojtja paralajmëron se do të kundërshtojë në mënyrë të vazhdueshme provat e paraqitura nga SPAK, duke i cilësuar si të interpretuara në mënyrë të njëanshme. Ndërkohë, seanca u shty për në datën 26 qershor.

Çfarë paraqesin pamjet filmike?

Sipas SPAK, në pamjet filmike të kompleksit “Golden”, shihet momenti kur trupi i Jan Prengës transportohet nga një automjet në një tjetër, ngjarje që ndodh në garazhin e kompleksit. Po sipas SPAK, Festim Bexhdili ishte prezent në këtë moment dhe më pas është larguar së bashku me persona të tjerë të përfshirë në rrëmbim. Kompleksi “Golden” rezulton të jetë pika kyçe në këtë çështje, ndërsa Prokuroria e Posaçme pretendon se aty u mbajt dhe më pas u zhduk trupi i Jan Prengës.

Rrëmbimi dhe zhdukja e Jan Prengës

Jan Prenga u rrëmbye në 17 janar 2020. Urdhri për rrëmbimin dhe vrasjen e 49-vjeçarit Jan Prenga dyshohet se ka ardhur nga një burg në Ekuador, ku vuante dënimin shqiptari Dritan Rexhepi. Ky i fundit është një emër i njohur nga drejtësia shqiptare, pasi akuzohet për vrasjen e disa policëve në Krujë ndërsa pas krimit u arratis. Gjithashtu në 2014-n ai u arrestua me 240 kg kokainë në Ekuador.

Ndërkohë që për zbardhjen e ngjarjes së ndodhur më 17 janar në Kamzë, hetuesit shqiptarë zbuluan përgjimet telefonike nga Ekuadori, lidhur me sasinë e kokainë që do të transportohej nga Amerika Latine në Britani. Kokaina u mor për t’u transportuar nga vëllai i viktimës, Astrit Prenga, i cili nuk e dorëzoi kurrë dhe në formë hakmarrje u vendos rrëmbimi dhe më pas vrasja e Jan Prengës.