U la jashtë listës, deputeti i PS-së: Kryeministri dhe kryesia kanë menduar një gjë më të mirë. Kam patur oferta nga kundërshtarët, por ...
Nga OraNews Përditësimi i fundit 27 Mars 2025, 20:23
Deputeti i Partisë Socialiste, Denis Deliu, ka reaguar pas përjashtimit të tij nga listat e kandidatëve për deputetë në zgjedhjet parlamentare të 11 majit.
I ftuar në studion e News24, Deliu pranoi se nuk e kishte pritur plotësisht këtë vendim, por tha se është i përgatitur për çdo situatë.
“Me thënë të drejtën nuk është se e prisja 100%, por nisur nga sfondi im si ushtarak jam i përgatitur për të gjitha. Listat janë pjesë e një vizioni që nuk bëhet gjithnjë ashtu si ti mendon. Për punën dhe kontributin tim prisja të isha në listën e hapur, sepse në listën e mbyllur u qartësua nga kryeministri që nuk do të ishim.
Mendoj se kryeministri dhe kryesia kanë menduar një gjë më të mirë. Kam patur oferta nga kundërshtarë politikë, por nuk mund ta imagjinoj të kaloj në një parti tjetër. Unë besoj te PS dhe vlerat e saj”, tha Delia në News24.
