Inflacioni sipas metodologjisë së EUROSTAT, 2.3 % në tetor
Nga OraNews Përditësimi i fundit 20 Nëntor 2024, 20:55
Indeksi i harmonizuar i çmimeve të konsumit u rrit në tetor me 2.3%. Ky indeks, synon të japë ecurinë krahasuese të çmimeve me vendet e Bashkimit Europian. Për tetorin, norma zyrtare e inflacionit në Shqipëri rezultoi 1.9%.
Grupi i ushqimeve historikisht ka qenë kontribuesi kryesor në rritjen e indeksit të harmonizuar të çmimeve. Sipas INSTAT, në tetor, ai kontribuoi me 4.1% në rritjen totale.
Pasuar nga grupet “Argëtim dhe kulturë” me 3.7 %, “ushqime dhe pije joalkoolike” me 3.6 %, “veshje dhe këpucë” me 3.3 %, “mobilim, pajisje shtëpie dhe mirëmbajtje” me 3,0 %, “hotele, kafene dhe restorante” me 2.1 %, “mallra dhe shërbime të ndryshme” me 2 %, “shëndeti” me 1.7 %, “shërbimi arsimor” me 1.1 %, “qira, ujë, lëndë djegëse dhe energji” me 0.9 %, “komunikimi” me 0.7 %. Nga ana tjetër çmimet e grupit “transporti” u ulën me 3.1%.
Mbështetur në metodologjinë e përdorur nga INSTAT, indeksi i harmonizuar i çmimeve të konsumit përfshin shpenzimet e bëra brenda territorit të vendit nga familjet shqiptare, si dhe shpenzimet e vizitorëve, ndërsa indeksi i çmimeve të konsumit mbulon vetëm shpenzimet private të familjeve shqiptare të kryera brenda dhe jashtë vendit.
