PS përkujton demonstratën, Spiropali: 21 Janari 2011, një fakt i ri që bërtet për drejtësi
Nga OraNews Përditësimi i fundit 21 Janar 2023, 09:13
Sot shënohen 12 vite nga 21 janari ku mbetën të vrarë katër protestues gjatë demonstratës së dhunshme të Partisë Socialiste në atë kohë në opozitë para Kryeministrisë.
Katër demonstruesit e vrarë Ziver Veizi, Faik Myrtaj, Hekuran Deda dhe Aleks Nika u shpallën dy vite më parë “Dëshmorë të Atdheut” në 10-vjetorin e protestës në të cilën ata humbën jetën
Ministrja e Shtetit për Marrëdhëniet me Parlamentin, Elisa Spiropali në një deklaratë për mediat u shpreh se 21 Janarit 2011 është një fakt i ri që bërtet për drejtësi.
"E dinë të gjithë që në 21 janar nuk pati vdekje aksidentale, po vrasje shtetërore. Por publikimi dje i transkriptit të një audioje ku flitet për armë zjarri dhe gatishmëri për zjarr sapo protestuesit të kalojnë gardhin, ndërkohë që katër dëshmorët e asaj dite të zymtë u vranë shumë larg gardhit të Kryeministrisë, kërkon reagimin e menjëhershëm të organeve të drejtësisë.
Ky është një fakt i ri që bërtet shumë fort për drejtësi në emër të viktimave, jetimëve, familjarëve dhe vetë demokracisë së përgjakur në 21 janar.
Nuk jam këtu për të bërë politikë sot, në ditën e homazheve që sot do të bëhen me një dritëz të re shprese se drejtësia e re do të hapë menjëherë hetimin e çështjes.
Jam këtu për të thënë se ne nuk kemi hequr e nuk do të heqim dorë kurrë nga drejtësia për 21 janarin, por drejtësinë e kërkojmë nga drejtësia. Sot edhe më shumë sepse ato zëra nga shpella e vrasjeve të asaj dite tragjike, flasin vetë edhe më shumë se sa të gjitha fjalët tona." - tha Spiropali
