Pas heqjes së barrikadave kujtohet edhe Rama: Asgjë e re, të gjithë u kthyen në shtëpi me fitore
Nga OraNews Përditësimi i fundit 29 Dhjetor 2022, 17:40
Kryeministri i Shqipërisë, Edi Rama ka reaguar vetëm pas nisjes së heqjes së barrikadave në veri të Kosovës të vendosura nga pala serbe.
Rama shkruan se pas fjalëve që u ngritën dhe manovrave ushtrake që patën hov, fundi ishte i njëjtë dhe të gjithë u kthyen në shtëpi me fitoren e vet.
Ai shkruan se doli edhe kuptimi i ri i barrikadës, e cila pas 434 vjetësh hyri në listën e mjeteve të protestës paqësore me bekimin e BE dhe të SHBA.
Rama: Asgjë e re, shfaqja zgjati ca më shumë, tensioni u ngrit ca më lart, fjalët u këmbyen me ca më shumë zjarr, manovrat ushtarake patën ca më shumë hov, po fundi qe po i njëjti dhe të gjithë u kthyen në shtëpi, sekush me fitoren e vet me vete si gjithmonë!
Ah po, diçka e padëgjuar ndodhi! Doli kuptimi i ri i barrikadës, e cila pas 434 vjetësh hyri në listën e mjeteve të protestës paqësore me bekimin e BE dhe të SHBA! Shpresojmë në mirëkuptimin e aleatëve tanë strategjikë për të mos qenë dakord në këtë pikë. Po fare!
Pyetja mbeti po ajo që ishte përpara këtyre barrikadave paqësore e deklaratave armiqësore! Dhe deri kur përgjigjet e ndryshme të nisen po njësoj nga e shkuara, pyetja do të mbetet po aty edhe pas shfaqjes së radhës, kur barrikadat të thyejnë paqësisht monotoninë e hiçzgjidhjes!
