BE pritshmëri të larta nga Bosnja, Varhelyi: Rekomandimet janë të qarta, rruga evropiane është e hapur

Nga OraNews Përditësimi i fundit 28 Nëntor 2022, 19:48

Rekomandimet e Bashkimit Europian për Bosnje Hercegovinën janë të qarta, ndërsa komisioneri për Zgjerimin nga Sarajeva përsëriti vendosmërinë e tetorit duke theksuar se rruga evropiane për vendin është e hapur, por hapat konkrete duhet të merren nga lidershipi boshnjak.

Komisioneri për Zgjerimin në Bashkimin Europian, Oliver Varheley ka folur për situatën politike në Bosnjë e Hercegovinë.

Gjatë një vizite të zhvilluar në Sarajevë, ai tha se rekomandimi i BE-së që Bosnjës t’i jepet statusi i kandidatit për anëtarësimin në Union është i qartë dhe i vendosur.

“Rruga evropiane është e hapur për BiH, por ne kemi pritshmëri të mëdha nga ju,” tha Varheley pas takimit që ai zhvilloi këtë të hënë me anëtarët e Presidencës së BiH.

Ndërkaq komisioneri theksoi se pavarësisht këtij rekomandimi, Brukseli kërkon të shikojë rezultate të prekshme dhe të qarta.

Varhelyi tha se është e nevojshme që Këshilli i Ministrave në mbledhjen e vjetër të miratojë të gjitha masat që janë të rëndësishme në atë rrugë.

Në raportin e tij të progresit të 12 tetorit, Komisioni Evropian i rekomandoi Këshillit të BE-së që t’i japë Bosnjë Hercegovinës statusin e vendit kandidat për anëtarësim në unionin evropian.

Ndërsa Brukseli renditi disa prioritete për idershipin e Bosnjës ku u nënvizua adoptimi i një ligji të ri për Prokurorin e Përgjithshëm.

Po ashtu BE pret rezultate në luftën ndaj korrupsionit dhe krimit të organizuar dhe të garantojë lirinë e shprehjes dhe të medies, si dhe mbrojtjen e gazetarëve.

Pas rekomandimit të Komisionit Evropian, statusi kandidat për një vend shqyrtohet dhe miratohet nga shtetet anëtare të BE-së, në nivel krerësh shtetesh dhe qeverish.

Në Ballkan, Kosova është e vetmja që nuk ka aplikuar ende për anëtarësim në Bashkimin Evropian, megjithëse kryeministri Albin Kurti është zotuar se do ta bëjë kërkesën në fund të vitit.