Alibeaj: PD gjithmonë në mbështetje të Kosovës, jemi kundër projektit të Open Ballkan
Nga OraNews Përditësimi i fundit 27 Nëntor 2022, 11:46
Nga foltorja e Kuvendit në seancën e përbashkët Kosovë-Shqipëri, në cilësinë e kreu të grupit parlament të PD-së, Enkelejd Alibeaj u shpreh se PD ka qenë mbështetëse e Kosovës.
Ai tha se PD ka pasur dhe ka kundërshti ndaj një projekti si ish-minishengen apo Open Ballkan, i cili është kundërshtuar nga parlamenti evropian dhe nga ana e Kosovës.
Alibeaj: Edhe pse në një mosdakordësi të plotë me qeverinë aktuale në Tiranë, PD ka votuar e mbështetur pa asnjë dilemë, çdo nisme që shkon në mbështetje apo me pjesëmarrjen e Kosovës. Kemi mbështetur mbledhjet e përbashkëta të dy qeverive dhe kemi kërkuar që marrëveshjet të implementohen në terren në mënyrë aktive e të mos mbeten në letër.
Kundërshtitë tona energjike ndaj një projekti si ish-minishengen apo Open Ballkan, i cili së fundmi edhe nga parlamenti evropian në dokumentin e strategjisë se zgjerimit u vlerësua me rezerva kundërshtuese, si i papërputhshëm me normat evropiane dhe që nuk garanton gjithëpërfshirje. Kundërshtitë tona për këtë projekt kanë qenë mbi të gjitha, se Kosova kurrë nuk e pranoi, se ky ishte e mbetet një projekt që e fut çështjen e Kosovës dhe rolin e shqiptarëve në Ballkan në një rrugë të dyshimtë e të paqartë.
Në prag të 110-vjetorit të Pavarësisë së Shqipërisë, sot (27 nentor 2022) në sallën e seancave plenare të Kuvendit u zhvillua mbledhja e parë të përbashkët e Kuvendit të Shqipërisë dhe Kuvendit të Kosovës.
Lexo me shume: Shqipëri - Kosovë një parlament, Albin Kurti: Të heqim dorë nga ndasitë. Rama: Marrëdhënie të shkëlqyera
