Një muaj negociata në "kosh", PD shkon e ndarë në zgjedhjet vendore
Nga OraNews Përditësimi i fundit 1 Nëntor 2022, 19:15
Gati një muaj negociata dhe asnjë rezultat. Dy grupimet, brenda Partisë Demokratike, të përfaqësuar nga Gazment Bardhi dhe Edi Paloka nuk kanë arritur një kompromis për zgjedhjet e ardhshme lokale.
Lajmin e konfimon grupi parlamentar i drejtuar nga Enkelejd Alibeaj, i cili u mblodh pasditen e të martës.
“Ne shprehim keqardhjen që në kundërshtim me zotimin publik për “bisedime pa kushte”, prevaloi interesi dhe kushti për të njohur “Statutin” e 11 Dhjetorit, duke minuar në këtë mënyrë bisedimet për të gjetur zgjidhje për zgjedhjet lokale. Anëtarët, simpatizantët dhe votuesit e Partisë Demokratike, janë të lodhur nga debati “kush është statuti në fuqi i Partisë Demokratike”. Ata kërkojnë zgjidhje për të unifikuar çdo zë opozitar përballë Edi Ramës në zgjedhje lokale” .
Grupi parlamentar demokrat bën të ditur gjithashtu se pala tjetër refuzoi edhe paketën finale të propozimeve dhe këtë e konsideron si mungesë sinqeriteti dhe vullneti për të gjetur zgjidhje.
Pretendimet ndërkaq u hodhën poshtë nga Sali Berisha i cili tha se askush nuk mund të prekë flamurin e PD.
"Ata nuk duan as statutin, as primaret dhe as fraksionin. Të sigurt të jeni se ai që prek flamurin e PD i ka bërë hesapet shumë, shumë keq."
Në këtë situatë ligjvënësit demokratë kërkojnë të informojnë Kryesinë e Partisë Demokratike, për ti hapur rrugë krijimit të të gjitha kushteve për përgatitjen dhe pjesëmarrjen në zgjedhjet e ardhshme vendore.
