"Rusia po nxit shpopullim", Zelenski: Sulmet në objektet e energjisë synojnë të rrisin migrimin
Nga Amado Çela Përditësimi i fundit 21 Tetor 2022, 08:06
Për presidentin Zelenski sulmet kundër infrastrukturës energjetike që kryesisht janë bërë me dronë kanë për qëllim shpopullimin e ukrainasve dhe për këtë Kievit sipas i duhen më shumë sisteme mbrojtëse.
Presidenti ukrainas ka deklaruar se sulmet ruse kundër infrastrukturës energjetike kanë për qëllim nxitjen e një vale migratore nga Ukraina drejt vendeve të unionit evropian.
"Terrori rus kundër objekteve të energjisë ka qëllim krijimin e sa më shumë problemeve me energjinë dhe nxehtësinë në Ukrainë këtë vjeshtë dhe dimër me qëllim që sa më shumë ukrainas të nisen drejt vendeve të BE-së," tha ai.
Sipas tij, këto veprime duhet të kenë përgjigje të menjëhershme, fillimisht përmes sistemeve të shumta për mbrojtje ajrore.
"Ne duhet të bëjmë gjithçka që është e mundshme që t’ia pamundësojmë Rusisë shkatërrimin e sistemit tonë energjetik me raketa dhe dronë," tha ai.
Rusia ka shtuar numrin e sulmeve në objekte banesore dhe infrastrukturë prej 10 tetorit, duke përdorur kryesisht dronë kamikazë.
Ukraina dhe Perëndimi besojnë se ky lloj i dronit është prodhuar nga Irani.
Moska dhe Teherani kanë hedhur poshtë akuzat.
