Skandal në Shkodër: Rëra e Velipojës fitohet me dokumente të falsifikuara. Prokuroria pushon hetimin

Nga Alketa Çeku Përditësimi i fundit 16 Tetor 2022, 14:59

Janë 390 dynym rërë në vijën bregdetare të Velipojës që janë përfituar më dokumente të falsifikuara por pavarësisht  këtij fakti  prokuroria e Shkodrës  ka vendosur  të pushojë hetimet.  

‘Ora investigim’ do zbulojë hap pas hapi skemën e këtij skandali.

Nga dosja rezulton se këtë pronë e ka fituar një 99-vjeçare e ndjerë  e cila ka lindur në Velipojë por banonte në Grizhë të Malsisë Madhe.

Pretendohet se shtetasja me iniciale D.H i ka dhënë prokurë shtetasit Ardian Beci për të kërkuar pronat e saj.

Ky shtetas ka paraqitur kërkesën pranë Agjencisë se Kthim Kompensimit Pronave në Tiranë për kthimin e sipërfaqes 390 dynym tokë por kjo kërkesë është  refuzuar për shkak se dokumentacioni nuk ishte i plotë.  

Më pas çështja kalon në gjykatë e cila vendos kthimin e tokës të moshuarës. Pas fitimit të pronësisë e moshuara pretendohet se bën një testament duke dhuruar tokën. 

E moshuara  është përdorur si trampolinë për fitimin pronësisë me pas ka dalë jashtë loje duke dhuruar pronën. 

Sipas ekspertizës kemi të bëjmë me falsifikimin e  dy dokumenteve noteriale. Është falsifikuar prokura e shtetasit Ardian Beci njëkohësisht edhe testamenti i 99 vjeçares. 

Kjo çështje më pas i kalon Prokurorisë  ku nga Instituti i Policisë Shkencore vërtetohen  ndërhyrje  në dokumentacion dhe vula.  

Pjese e dosjes është edhe dëshmia e shtetases me  iniciale  T.L emri i të cilës figuron te vërtetimi hipotekor i vitit 1997,ajo  ka dëshmuar se nuk e ka firmosur asnjë dokument hipotekor për më tepër  në këtë periudhë  ajo nuk punonte në hipotekën e Shkodrës por në Prokurorinë e Tiranës.  

E ndodhur para një varg falsifikimesh të provuara prokurorja Franceskina Lekani ka kërkuar pushimin e çështjes. Sipas avokatit Loren Liço ne këto raste  prokuroria duhet të kërkojë sekuestrimin e dokumenteve të falsifikuara dhe asgjësimin e tyre.

Ne lidhje me kërkesën e prokurores Franceskina Lekani për pushimin e hetimeve fjalën e fundit pritet që ta thotë Gjykata e Shkodrës.  

Në ditët në vazhdim ‘Ora investigim’ do të sjelli fakte tronditëse se si prokuror që  nuk u përballën me procesin e veti ngut, por u tërhoqën  për shkak të pasurisë të pajustifikuar  rezulton  se posedojnë pallate shumëkatëshe në bregdet.

Këto ish prokurorë  të shndërruar në avokat  po shijojnë milionat e tyre të pajustifikuara dhe të pa hetuara nga drejtësia.