Irani hyn në një kapitull të ri, protestat nuk ndalen
Nga OraNews Përditësimi i fundit 14 Tetor 2022, 11:42
Me vdekjen e 22-vjeçares Mahsa Amini katër javë më parë, Irani hyri në një kapitull të ri. Një kapitull protestash, grevash dhe aktivizmi.
Për herë të parë në më shumë se një dekadë, shumë iranianë brenda dhe jashtë vendit kanë bashkuar forcat për të shprehur kërkimin e tyre për liri.
Për habinë e shumë vëzhguesve, pavarësisht shtypjes së dhunshme të protestave, vdekjes së më shumë se 200 personave dhe arrestimit të mijëra njerëzve, protestat kanë vazhduar dhe ato janë kthyer në atë që disa vëzhgues po e quajnë kryengritje.
Gazetarët e huaj dhe të pavarur nuk lejohen brenda vendit, gjë që e bën edhe më të vështirë raportimin e ngjarjeve.
Por videot që po publikohen nga dhjetëra qytete tregojnë se ky është tashmë një nga kërcënimet më serioze ndaj ekzistencës së Republikës Islamike.
Shumë dëshmitarë thonë se forcat e sigurisë janë në prag të dorëzimit. Disa analistë thonë se nëse protestat vazhdojnë me të njëjtin intensitet, qeveria do të jetë gjithnjë e më e vështirë t'i shtypë ato.
