VIDEO/ Forcat iraniane qëllojnë protestuesit me armë të montuar në kamion

Nga OraNews Përditësimi i fundit 14 Tetor 2022, 11:20

Janë shfaqur pamjet video që tregojnë forcat iraniane të sigurisë që qëllojnë mbi njerëzit me një armë të montuar në pjesën e pasme të një kamioni.

Në klipin e verifikuar nga shërbimi persian i BBC-së, dëgjohen zhurma teksa automjeti ndjek njerëzit në Baneh, në provincën e Kurdistanit.

Kurdistani është përballur me një goditje të ashpër që nga fillimi i protestave masive që kanë përfshirë vendin muajin e kaluar.

Zemërimi që çoi në protesta u shkaktua nga vdekja në paraburgim e një gruaje kurde 22-vjeçare, Mahsa Amini, gati një muaj më parë. Amini ishte arrestuar dhe dhunuar nga policia morale e Iranit për akuzën se kishte shkelur ligjin që kërkonte që gratë të mbulonin flokët me hixhab ose shami.

Një grup i të drejtave të njeriut thotë se më shumë se 200 njerëz janë vrarë.

KËTU LAJMET MINUTË PAS MINUTE

Numri i saktë i viktimave dhe të plagosurve është i vështirë për t'u verifikuar pasi BBC dhe media të tjera të pavarura janë të ndaluara të raportojnë nga brenda Iranit. Autoritetet gjithashtu kanë ndërprerë internetin.

Organizata e të Drejtave të Njeriut në Iran, me bazë në Norvegji, ka përcaktuar numrin e të vdekurve në 201, përfshirë 23 fëmijë, që nga e mërkura, megjithëse shifra e vërtetë besohet të jetë më e lartë.