Publikohet foto e parë me ngjyra të hapsirës kozmike
Nga Ora News Përditësimi i fundit 12 Korrik 2022, 07:54
Fotografia e parë me ngjyra të plota është publikuar nga teleskopi i ri hapësinor James Webb – dhe është një mrekulli.
Imazhi thuhet të jetë pamja më e thellë, më e detajuar me rreze infra të kuqe e Universit deri më sot, që përmban dritën nga galaktikat që u janë dashur miliarda vjet për të arritur tek ne.
Presidenti amerikan Joe Biden e shfaqi imazhin gjatë një konference në Shtëpinë e Bardhë.
Fotot e tjera debutuese nga James Webb do të publikohen nga Nasa në një prezantim global të martën.
"Këto imazhe do t'i kujtojnë botës se Amerika mund të bëjë gjëra të mëdha dhe do t'i kujtojnë popullit amerikan - veçanërisht fëmijëve tanë - se nuk ka asgjë përtej kapacitetit tonë," vuri në dukje Presidenti Biden.
"Ne mund të shohim mundësi që askush nuk i ka parë më parë. Mund të shkojmë atje ku askush nuk ka shkuar më parë."
Teleskopi Hapësinor James Webb (JWST) prej 10 miliardë dollarësh, i nisur më 25 dhjetor të vitit të kaluar, është faturuar si pasardhësi i teleskopit të famshëm hapësinor Hubble.
Ai do të bëjë të gjitha llojet e vëzhgimeve të qiellit, por ka dy qëllime kryesore. Njëra është të bëjë fotografi të yjeve të parë që shkëlqenin në Univers më shumë se 13.5 miliardë vjet më parë; tjetra është të hetohen planetët e largët për të parë nëse mund të jenë të banueshëm.
Ajo që shihni është një grumbull galaktikash në konstelacionin e Hemisferës Jugore të Volanëve, i njohur me emrin SMACS 0723.
Vetë grupi në fakt nuk është aq larg - rreth 4.6 miliardë vite dritë në distancë. Por masa e madhe e këtij grupi ka përkulur dhe zmadhuar dritën e objekteve që janë shumë, shumë më larg.
Ky është një efekt gravitacional; ekuivalenti astronomik i një lente zmadhimi për një teleskop.
Webb, me pasqyrën e tij të artë 6.5 metra të gjerë dhe instrumentet infra të kuqe super të ndjeshme, ka arritur të zbulojë në këtë foto formën e shtrembëruar (harqet e kuq) të galaktikave që ekzistonin vetëm 600 milionë vjet pas Big Bengut (Universi është 13.8 miliardë vjeç).
