Komisioni hetimor për 6 janarin: Donald Trump tentoi të kryente grusht shteti
Nga Amado Çela Përditësimi i fundit 10 Qershor 2022, 14:19
Donald Trump e ka quajtur një gjueti shtrigash komisionin hetimor të ngritur nga Dhoma e Përfaqësuesve për të hetuar mësymjen e mbështetësve të republikanit në 6 janar 2021 në Kongresin Amerikan.
Të enjten deri në orët e para të së premtes u mbajt seanca e parë e komisionit hetimor i cili do të përpiqet të hedhë dritë mbi rolin e presidentit të atëhershëm Trump për dhunën e përdorur nga protestuesit në selinë e Kapitolit.
Në seancën e parë, paneli pretendoi se Donald Trump tentoi të kryente grusht shteti dhe se ishte nxitësi kryesor i dhunës në Kapitol Hill.
Seanca ishte transparente edhe për publikun dhe një grup kryesisht mbështetësish të Partisë Demokratike po e ndiqnin seancën në oborrin jashtë Kongresit.
Nënkryetarja Republikane e panelit, një kritike e Donald Trump, bëri fajtor drejtpërdrejt 76-vjeçarin për protestat e dhunshme në Kapitol.
Konkluzionet e komisionit hetimor dolën pas dëshmive të dhëna pas dyerve të mbyllura nga disa prej këshilltarëve të ish-presidentit Trump, duke përfshirë ish-prokurorin e Përgjithshëm Bill Barr.
Ndërsa priten edhe pesë seanca të tjera në radhë, zëdhënësi i Donald Trump, Taylor Budowich e quajti seancën e parë të komisionit hetimor një cirk të paaftësh që tentojnë të tërheqin vëmendjen e publikut.
