Kriza, Danaj: S'mund t'i thuhet qytetarëve sakrifikoni për vjedhjet që ne kemi bërë ndër vite
Nga OraNews Përditësimi i fundit 13 Prill 2022, 17:35
Kryeministri Rama ka paralajmëruar se mund të na duhet të përballemi me mungesë të energjisë elektrike si pasojë e krizës.
Eksperti i ekonomisë, Vjoldi Danaj në një intervistë në RTV Ora me gazetaren Besmira Pelushaj ngriti shqetësimin e mbrojtjes së konsumatorit përballë krizës së çmimeve. Danaj tha se konsumatori është krejtësisht i zhveshur dhe nuk ka asnjë mbrojtje.
Danaj: Duhet të bëhet një hetim i të gjithë tenderave që janë dhënë. Është e pamundur që të deklarohen miliona euro investim në rrjetizimin energjitik të Shqipërisë dhe ne vazhdojmë të jemi me rrjetizimin e kohës së komunizmit. SPAK duhet të fillojë disa hetime për shpërdorimin e fondeve sepse janë para publike. SPAK e ka të drejtën të kontrollojë paratë e qytetarëve.
Sot kemi tendera që janë deklaruar sikur kanë shkuar në investime për teknologji apo infrastrukturë dhe ato nuk dihen sepse situata i ka nxjerrë zbuluar që ka pasur një shpërdorim apo vjedhje të tyre. Nuk është e drejtë që sot t'i thuhet qytetarëve apo bizneseve ju duhet të sakrifikoni për vjedhjet që ne kemi bërë ndër vite. Kjo nuk ndodh në asnjë vend normal.
Sa i përket bordeve të transparencës që qeveria ka ngritur për mbrojtjen e konsumatorëve, Danaj i shikon si qesharake. Sipas tij janë borde që nuk kanë asnjë lloj funksionaliteti, janë një fasadë për t'i mbyllur gojën qytetarëve por që nuk kanë asnjë efekt.
