Basha për paketën e rezistencës së Ramës: Me lëmoshë nuk zgjidhet kriza, vetëm thellohet më shumë
Nga OraNews Përditësimi i fundit 14 Mars 2022, 11:55
Kreu i Partisë Demokratike, Lulzim Basha, e konsideron të pamjaftueshme paketën e rezistencës sociale të prezantuar nga qeveria.
Në një postim në facebook, Basha thotë se Edi Rama vazhdon të tallet me qytetarët me gjoja paketa shpëtimi por është e njëjta skemë siç bëri në kohën e pandemisë, ku shumica dërmuese e shqiptarëve u zhyten në mjerim.
"Qeveria ka parashikuar të shpërndajë lëmoshë tek grupe të kufizuara, që po mbijetojnë, kur në fakt rritja e çmimeve prek të gjitha shtresat dhe do të zhysë në varfëri qindra mijëra familje".
Edhe pse situata është zi, Basha thotë se zgjidhje ka.
"Ia kemi propozuar kohë më parë ku i kërkuam të marrë masa. Sepse shqiptarët janë aq të varfër sa nuk i përballojnë dot kostot shtesë për të përmbushur nevojat bazë.Mjafton të shohësh vendet fqinje për të kuptuar se ka zgjidhje që ndihmojnë të gjithë qytetarët.Kuvendi i Maqedonisë së Veriut ka miratuar ligjin për uljen e akcizës për karburantet dhe Tatimit mbi Vlerën e Shtuar nga 18 në 10 %. Po kështu ka vendosur për uljen e TVSH-së për ushqime bazë nga 5 në 0 %".
Sipas Bashës, ndërkohë që Rama bën sikur po ndihmon qytetarët, në këtë kohë krize qeveria po programon më shumë taksa; do rikthejë taksën për Biznesin e Vogël dhe një sërë taksash të tjera që do ta rëndojnë edhe më shumë gjendjen.
"Me lëmoshë nuk zgjidhet kriza, ajo vetëm thellohet më shumë".
