Sekuestrohen mbi 3 kg kanabis dhe një armë gjaku, një i arrestuar në Tepelenë
Nga OraNews Përditësimi i fundit 11 Mars 2022, 10:41
Policia e Tepelenës ka sekuestruar 3 kilogramë e 75 gramë lëndë e dyshuar narkotike cannabis sativa dhe një armë gjahu pa lejen përkatëse dhe ka vënë në pranga poseduesin.
Blutë bëjnë me dije se bazuar në informacionet e siguruara në rrugë policore se në fshatin Xhafaj, Memaliaj, shtetasi B. K. posedonte lëndë narkotike, ushtruan kontroll në banesën e tij.
Gjatë kontrollit të ushtruar në banesën e shtetasit B. K., u gjetën 3.75 kg lëndë e dyshuar narkotike cannabis sativa dhe një armë gjahu pa lejen përkatëse.
Në përfundim të veprimeve hetimore u arrestua në flagrancë shtetasi B. K., banues në fshatin Xhafaj, Memaliaj.
Materialet në ngarkim të këtij shtetasi i kaluan Prokurorisë pranë Gjykatës së Shkallës së Parë Gjirokastër, për veprat penale "Prodhimi dhe shitja e narkotikëve" dhe "Mbajtja pa leje e armëve të gjuetisë dhe sportive".
