Tifozi “special” Refit Rezhda, 65 vjet jetë, 50 vjet me Skënderbeun
Nga Iris Rezhda Përditësimi i fundit 10 Mars 2022, 13:26
Futbolli pa tifozë me gjasë nuk do të kishte kuptim e as emocion. Refit Rezhda, sot 65 vjeç është një prej më të veçantëve në stadiumet shqiptare ku prej 5 dekadash ndjek ekipin e Skënderbeut të Korçës.
Diell apo shi, në Korçë apo jashtë saj, Refit Rezhda, prej 50 vitesh është në stadium në mbështetje të ekipit të Skënderbeut.
Jo vetëm kur duhet mbështetja i tifozërisë, por edhe gjatë seancave stërvitore ai është aty.
Kur stadiumet u mbyllën gjeti mënyrën origjinale për t'i parë edhe ose një herë i kushtoi një dorë të thyer.
"Skënderbeu është gjithçka për mua. Shumicën e kohës dhe të jetës nëpër ndeshje e kam kaluar, në stërvitje", thotë Rezhda.
Edhe pse disa ndeshje janë luajtur dekada më parë, ai kujton me detaje momentet emocionuese.
"Ka qenë viti '76-'77 ndeshja me Tiranën në tiranë, kemi fituar 1-0 në minutën e 4", tha ai.
Për presidentin e Klubit Rezhda është tifozi më special.
"Refiku është tifozi më special i Skënderbeut, ne na bëhet qejfi me tifozë të tillë që e kanë ndjekur Skënderbeun në ditët më të mira dhe në ditët më të vështira", tha Presidenti.
Për ish-trajnerin e Skënderbeut, tifozë të tillë i shtojnë vlerën çdo klubi.
"Të gjitha marrëdhëniet e trajnerëve kanë qenë të mira me të dhe suporti i tij ka qenë i jashtëzakonshëm për ne."
Me 10 mars tifozi i kohërave të arta dhe të vështira bën 65 vjeç, por nuk do të dalë në pension si tifozi më i veçantë i Skënderbeut.
