Rritja e çmimit/ Protestuesit zhgarravisin me naftë derën e ministrisë së Energjisë: Qeveria e Edi Ramës po favorizon grosistët
Nga OraNews Përditësimi i fundit 7 Mars 2022, 10:12
Rritja e çmimit të naftës, i cili ka arritur 230 lekë për litër në ditët e fundit ka nxjerrë në protestë një grup të rinjsh në kryeqytet. Të mbledhur para ministrisë së Infrastrukturës dhe Energjisë ata fajësuan qeverinë për lejimin e situatave monopoliste në tregun e karburanteve ndërsa akuzuan kryeministrin për shkatërrimin e industrisë së nxjerrjes dhe përpunimit të naftës në vend. Në shenjë simbolike të rinjtë lyen me naftë derën e ministrisë.
"Rritja e çmimit të naftës është akti i fundit i luftës së tyre ndaj nesh. Rritja skandaloze e çmimit të naftës po ndikon në rritjen e gjithë artikujve të shportës ushqimore dhe në shtrenjtimin e përgjithshëm të jetesës. Shqipëria ka pasur një rafineri të fuqishme të përpunimit të naftës atë të Ballshit, por ajo është shkatërruar për skrap nga qeveria e Edi Ramës për të favorizuar grosistët që importojnë naftë. Kjo qeveri i ka bërë naftën gjithë ekonomisë shqiptare", ishte deklarata e grupit të protestuesve.
