Rusia jashtë Swiftit, Britania e Madhe ndërmerr sanksione personale ndaj Putin dhe Lavrov

Nga Amado Çela Përditësimi i fundit 27 Shkurt 2022, 11:07

Ashtu siç kishin paralajmëruar, shtetet kryesore të perëndimit kanë dëbuar Rusinë nga sistemi Swift, e cila do të godasë rëndë ekonominë ruse për shkak të pamundësisë për të ndikuar në tregjet evropiane.  

Franca, Gjermania, Italia, Shtetet e Bashkuara të Amerikës, Kanadaja dhe Britania e Madhe kanë dëbuar shumicën e bankave ruse nga Sistemi Swift e cila synon të godasë rëndë ekonominë e Rusisë.

Dëbimi nga Swift është pjesë e sanksioneve të perëndimit ndaj Rusisë, pasi kjo e fundit vendosi të pushtojë Ukrainën të enjten.

Përjashtimi i bankave ruse nga sistemi Swift i përdorur për transaksione prej trilionë dollarësh do të godasë rëndë ekonominë ruse dhe siç tha edhe Shtëpia e Bardhë pagesat do të kryhen përmes telefonit.

Vendet perëndimore gjithashtu kanë ngrirë asetet e bankës qendrore të Rusisë, masë e cila nuk mund ta lejojë Rusinë që të përdorë monedhën vendase për të kufizuar efektin e sanksioneve.

Të dielën edhe Britania e Madhe njoftoi se ka sanksionuar presidentin Vladimir Putin dhe ministrin e Jashtëm rus, Sergej Llavrov.

Britania e Madhe ka vendosur të ngrijë asetet ndaj dy zyrtarëve si pjesë e sanksioneve ndëshkuese për të dëmtuar ekonominë dhe ushtrinë ruse.

Putin dhe Llavrov do të bllokohen për të bërë biznes në Mbretërinë e Bashkuar në të ardhmen.

Sanksionet e fundit të perëndimit, janë të tretat pasi forcat ruse u futën në Ukrainë në kuadër të asaj që ata e quajtën operacion special për neutralizimin e infrastrukturës ushtarake ukrainase.