Ambasada amerikane në Kiev u bën sërish thirrje amerikanëve që të largohen menjëherë
Nga OraNews Përditësimi i fundit 25 Shkurt 2022, 15:50
Në një alarm sigurie të postuar gjatë natës, Ambasada e SHBA-së në Kiev u bëri thirrje përsëri qytetarëve amerikanë në Ukrainë që të largohen menjëherë duke përdorur çdo mundësi transporti tokësor komercial ose privat.
Në njoftim thuhet se ata që mbeten pas duhet të ushtrojnë kujdes të shtuar për shkak të potencialit për luftime aktive, krime dhe trazira civile.
“Qytetarët që mbeten në Ukrainë duhet të monitorojnë me kujdes njoftimet e qeverisë dhe mediat lokale dhe ndërkombëtare për informacion në lidhje me ndryshimin e kushteve të sigurisë dhe alarmet për strehim në vend”, - thuhet në njoftim.
Njoftimi e quajti situatën e sigurisë në Ukrainë shumë të paqëndrueshme, duke paralajmëruar se kushtet mund të përkeqësohen pa paralajmërim.
“Dijeni vendndodhjen e strehës tuaj më të afërt ose hapësirave të mbrojtura. Në rast të sulmit me mortaja dhe/ose raketa, ndiqni udhëzimet nga autoritetet lokale dhe kërkoni strehë menjëherë.”
Tashmë nuk ka më një prani diplomatike amerikane brenda Ukrainës. Grupi i vogël i diplomatëve që kishin mbetur janë zhvendosur nga Lviv në Poloni.
