KE "lëshon" dorën, miratohet fondi 3.2 miliardë euro për Ballkanin Perëndimor
Nga OraNews Përditësimi i fundit 25 Shkurt 2022, 15:00
Komisioni Evropian do të financojë me 3.2 miliardë euro 21 projekte në Ballkanin Perëndimor. Në zbatim të Procesit të Berlinit, fondet do të jepen për ndërtimin e hekurudhave, ndërtimin e impianteve të përpunimit të ujërave, por dhe digjitalizimin.
3.2 miliardë euro është shuma që Komisioni Evropian ka firmosur për të investuar në Ballkanin Perëndimor. Në deklaratën për mediet është bërë e ditur se janë 21 projekte që do të financohen dhe që kanë të bëjnë me transportin, digjitalizimin, klimën dhe ndërlidhjen e energjisë.
Ndër më kryesoret konsiderohet ndërtimi i linjës hekurudhore në rajon përfshirë korridorin Mesdhetar, Lindje-Perëndim dhe atë Rin-Danub, si dhe mes Shkupit në Maqedoninë e Veriut dhe kufirit bullgar.
Këto projekte do të lehtësojnë tregtinë rajonale, do të reduktojnë kohën e udhëtimit dhe do të nxisin një rritje të qëndrueshme ekonomike, duke sjellë përfitime të mëdha për qytetarët dhe bizneset.
Gjithashtu dhe trajtimi i ujërave të zeza do të jetë prioritet në fondin e akorduar.
Në këtë mënyrë duket se KE ka vendosur të çojë përpara atë që konsiderohet Procesi i Berlinit përmes të cilit sigurohet rritja ekonomike e vendeve të Ballkanit, krijimi i një tregu të përbashkët por dhe lëvizja e lirë.
Ndërlidhjet më të mira dhe më të qëndrueshme në transport, në infrastrukturën digjitale dhe në energjinë e rinovueshme do të nxisin ekonominë, do të çojnë përpara tranzicionin e gjelbër dhe digjital të rajonit, si dhe do të sjellin një numër mundësish për njerëzit dhe bizneset në Ballkanin Perëndimor dhe në mbarë BE-në.
Këto investime do të përshpejtojnë gjithashtu integrimin e rajonit, në përputhje me perspektivën e tij të qartë evropiane”, tha Komisioneri i BE-së për Fqinjësinë dhe Zgjerimin, Olivér Várhely.
Gjatë viteve të ardhshme, Plani Ekonomik dhe i Investimeve do të mobilizojë deri në 30 miliardë euro investime, si një kombinim i granteve, kredive preferenciale dhe garancive.
