“Meta” kërcënon se mund të mbyllë Facebook-un dhe Instagram-in në Evropë

Nga OraNews Përditësimi i fundit 7 Shkurt 2022, 16:45

Facebook dhe Instagram mund të mbyllen në të gjithë Evropën, ka thënë kompania mëmë “Meta”.

Çështja lidhet me rregullat evropiane të të dhënave që pengojnë Meta-n, kompaninë e njohur më parë si Facebook, të transferojë, ruajë dhe përpunojë të dhënat e evropianëve në serverët me bazë në SHBA.

Në raportin e tij vjetor drejtuar Komisionit të Letrave me Vlerë dhe Shkëmbimeve të SHBA-së, autoriteti financiar i vendit, “Meta” paralajmëroi të enjten e kaluar se nëse nuk miratohet një kuadër i ri dhe kompania nuk mund të përdorë më modelin aktual të marrëveshjeve, me siguri do të duhet të largohet nga kontinenti.

“Meta” tha se përpunimi i të dhënave të përdoruesve mes vendeve është thelbësor për shënjestrimin e biznesit dhe reklamave.

"Nëse nuk jemi në gjendje të transferojmë të dhëna mes vendeve dhe rajoneve në të cilat operojmë, ose nëse jemi të kufizuar nga shkëmbimi i të dhënave midis produkteve dhe shërbimeve tona, kjo mund të ndikojë në aftësinë tonë për të ofruar shërbimet tona, mënyrën në të cilën ne ofrojmë shërbimet tona ose aftësia jonë për të synuar reklamat”, - thuhet në deklaratë.

Meta sqaroi se mendon se do të jetë në gjendje të arrijë një marrëveshje të re këtë vit, por nëse nuk e bën, tha:

"Ne nuk do të jemi në gjendje të ofrojmë një numër të produkteve dhe shërbimeve tona më të rëndësishme, duke përfshirë Facebook dhe Instagram, në Evropë."

Meta mund të përdorte më parë një kornizë të transferimit të të dhënave të quajtur Privacy Shield si bazë ligjore për të kryer transferime transatlantike të të dhënave.

Por në korrik 2020, Gjykata Evropiane e Drejtësisë e anuloi traktatin për shkak të shkeljeve të mbrojtjes së të dhënave.

Autoriteti më i lartë ligjor i bllokut argumentoi se standardi nuk mbron në mënyrë adekuate privatësinë e qytetarëve evropianë.

Si rezultat, kompanitë amerikane u kufizuan në dërgimin e të dhënave evropiane të përdoruesve në SHBA dhe u është dashur të mbështeten në SCC (klauzola standarde kontraktuale).

BE dhe SHBA kanë thënë se po punojnë për një version të ri ose të përditësuar të traktatit.