Emri/ Shqiptari kapet në fermë kanabisi në Britani, burgoset
Nga OraNews Përditësimi i fundit 12 Janar 2022, 21:21
Një shqiptar i kapur me 171 bimë kanabisi me vlerë më shumë se 100,000 paund pasi policia kontrolloi një shtëpi në Gainsborough, është dënuar me 27 muaj burg, tha të premten Gjykata e Lincoln Crown.
Fabio Balliu, 23 vjeç, nga Main Street, Huthwaite, pranë Mansfield, u arrestua në pronën në Spring Gardens pasi oficerët u lajmëruan fillimisht nga një fqinj i cili besonte se po ndodhte një vjedhje.
Oficerët shkuan dhe menjëherë ndjenë erën e kanabisit që vinte nga brenda pronës dhe zhurmën e ventilatorëve elektrikë.
Balliu hapi derën e hyrjes dhe u largua me vrap nga prona por u ndalua dhe u arrestua.
Ai u tha oficerëve: “Ok, unë jam nga Shqipëria. Anglishtja ime nuk është e mirë.”
Policia gjeti një zonë ndenjeje në dhomën e përparme me një shtrat dhe frigorifer të zbrazët, çka ngriti dyshime se kultivuesi ndoshta nuk jetonte në pronë.
Në shtëpi u gjetën tre zona kultivimi, me 87 bimë kanabis në fazën e lulëzimit dhe 84 bimë kanabis në gjendje vegjetative.
Një ekspert droge vlerësoi vlerën e mundshme të kanabisit midis 24,500 dhe 102,600 £ në varësi të sasisë dhe mënyrës se si do shitej.
