Zjarr në një ndërtesë në Japoni, 27 persona dyshohet se kanë humbur jetën
Nga OraNews Përditësimi i fundit 17 Dhjetor 2021, 08:38
Të paktën 27 persona dyshohet se kanë humbur jetën pas një zjarri në një ndërtesë tregtare në Japoninë perëndimore, sipas transmetuesit NHK.
Zjarri shpërtheu në katin e katërt të një ndërtese tetë-katëshe në një zonë tregtare dhe argëtimi në qytetin e Osaka të premten, 17 dhjetor.
Një zyrtar në departamentin e zjarrfikësve të qytetit Osaka i tha Reuters se 27 persona pësuan arrest kardiopulmonar, termi i përdorur në Japoni përpara se një vdekje të konfirmohej zyrtarisht.
TV Asahi tha se nëntë persona janë konfirmuar të vdekur.
Videot e transmetuara në rrjet treguan tym që dilte nga dritaret e katit të katërt të ndërtesës, ku ndodhet një klinikë psikiatrike.
Katet e tjera të ndërtesës, e cila është afër stacionit kryesor të Osakës në qendër të qytetit, ishin të zëna nga një sallon bukurie, një dyqan rrobash dhe një shkollë , tha NHK.
Burime policore i thanë Kyodo News se po hetojnë zjarrvënien e dyshuar, duke përfshirë raportet se një burrë ndezi zjarr në ndërtesë.
Burri besohej të ishte një pacient në klinikë, tha gazeta Mainichi.
