Rritja e energjisë, për rishikimin e tarifave do analizohen kostot dhe treguesit e OST dhe OSSH

Nga OraNews Përditësimi i fundit 4 Dhjetor 2021, 16:14

Enti Rregullator i Energjisë vendosi të shqyrtojë kërkesat e operatorëve të transmetimit dhe shpërndarjes për rritjen e çmimit të energjisë elektrike.

Rishikimi i tarifave do të bëhet në bazë të treguesve financiarë të dy kompanive, ndërkohë kosto fundore bie mbi konsumatorin edhe pse tarifat me të larta të parashikuar mbi biznesin e madh. Operatori i Sistemit të Shpërndarjes dhe Operatori i Sistemit të Transmetimit kërkojnë tarifa më të larta. 

Kush ka lidhje tensioni 35kv, 20kv dhe 0.4 kv, do të paguajë më shtrenjtë energjinë elektrike.

Pak javë nga aplikimi i OST dhe OSSH për rritje të çmimit të energjisë Enti Rregullator ka vendosur të nisë procedurat e shqyrtimit të kërkesës.

Sipas dokumentit të publikuar në Fletoren Zyrtare, specifikohet se do të jetë analiza e kostove të realizuara por dhe të parashikuara dhe e treguesve teknikë, ekonomikë dhe financiarë të dy operatoreve, ajo qe do te shërbejë për të vlerësuar nëse shoqëritë janë në rrethanat, të cilat kërkojnë rivlerësimin e nivelit të tarifave.

Enti Rregullator i Energjisë jep të dhëna edhe mbi totalin e të ardhurave të kërkuara nga 2 kompanitë, ku edhe bazohet kërkesa e tyre për rritjen e tarifave. Operator i Transmetimit kërkon të ardhura në vlerën e rreth 11 876 milionë lekëve ku sasia e energjisë e parashikuar për t’u lëvruar në rrjetin e transmetimit është 7.720 gigavat/orë.


Ndërsa Operatori i Shpërndarjes ka kërkuar 37 108 miliardë lekë dhe sasia e energjisë elektrike e parashikuar për të kaluar në rrjetin e shpërndarjes është 5.776 gigavat orë.

Nëse i referohemi aplikimit të bërë, OSSH ka kërkuar që tarifa e shpërndarjes për bizneset e lidhur në tension 35 kv të rritet në 2.61 lekë nga 1.5 lekë që është aktualisht. Për operatorët e lidhur me linjën e tensionit nga 20-6 kv tarifa të rritet nga 3.9 lekë/kw në 3.99 lekë. Rritje do të ketë edhe për tarifën mesatare të shpërndarjes, e cila pritet të shkojë në 6.63 lekë nga 4.79 lekë që është sot.


Kompania tjetër, OST që aktualisht ka një tarifë prej 0.75 lekësh për çdo kilovatore të transmetuar ka kërkuar që ajo të rritet me 96%, konkretisht nga 0.75 lekë/kw të shkojë 1.47 lekë/kwh.

Shtrenjtimi i tarifave të energjisë për biznesin e madh dhe të mesëm do të pasohet me çmime më të larta te produkteve apo shërbimeve dhe në fund kostot do paguhen nga qytetarët shqiptarë.