Çmim rekord / 11.6 mln euro për shënimet e rralla të Ajnshtajnit
Nga OraNews Përditësimi i fundit 24 Nëntor 2021, 12:43
Një dorëshkrim i rrallë i fizikanit, Albert Einstein, që dokumenton teorinë e tij të relativitetit arriti të shitet në vlerën rekord të 11.6 milionë eurove, në një Ankand në Paris.
Ai përmban punën përgatitore nga shkencëtari gjenial, të cilën ai e botoi në 1915. Duke i quajtur shënimet "dorëshkrimi më i vlefshëm i Ajnshtajnit që ka dalë ndonjëherë në shitje", Shtëpia e Ankandeve “Christie's” kishte vlerësuar përpara ankandit se do të arrinte 2 -3 milionë euro.
Dokumenti prej 54 faqesh i shitur të martën është shkruar me dorë në 1913 dhe 1914 në Cyrih, Zvicër, nga Ajnshtajni dhe kolegu dhe i besuari i tij, inxhinieri zviceran Michele Besso. Të dhënat e mëparshme për veprat e Ajnshtajnit ishin 2.8 milionë dollarë për të ashtuquajturën "Letra e Zotit" në 2018 dhe 1.56 milionë dollarë në 2017 për një letër për sekretin e lumturisë.
Ajnshtajni vdiq në vitin 1955 në moshën 76 vjeçare, duke u vlerësuar si një nga fizikantët teorikë më të mëdhenj të të gjitha kohërave.
Teoritë e tij të relativitetit revolucionarizuan fushën e tij duke prezantuar mënyra të reja për të parë lëvizjen e objekteve në hapësirë dhe kohë. Ajnshtajni gjithashtu dha një kontribut të madh në teorinë e mekanikës kuantike dhe fitoi çmimin Nobel për fizikë në 1921.
Vuçiq: Kërkesa e Serbisë, të shpeshtohen takimet me Kosovën
24 Nëntor, 12:37
