Pas koncertit tragjik me 8 viktima flet këngëtari: Nuk mund ta besoj, jam i dërrmuar
Nga OraNews Përditësimi i fundit 7 Nëntor 2021, 18:03
“Jam i dërrmuar. Nuk mund ta imagjinoj këtë që ndodhi”, tha reperi i njohur, Travis Scott, duke shprehur keqardhjen dhe zhgënjimin e tij më të thellë për tragjedinë gjatë koncertit të festivalin Astroworld në Teksas, SHBA.
Disa orë pasi vendi i koncertit u përlye me gjakun e tetë personave, ndërsa qindra tjerë u plagosën, këngëtari foli për ngjarjen tragjike, duke thënë se po bënte gjithçka që mundej për të ndihmuar familjet e viktimave.
"Në një postim në Instagram dje (6 nëntor), Scott shkroi se ishte "i shkatërruar " dhe se po përpiqej të ndihmonte në identifikimin e familjeve të viktimave.
Ai gjithashtu pohoi se nuk e kishte idenë se çfarë po ndodhte dhe "nuk mund ta imagjinonte kurrë seriozitetin e situatës".
Videot përkatëse që janë postuar orët e fundit në rrjetet sociale tregojnë të pranishmit në koncert duke bërtitur “ndale koncertin”, ndërsa dhjetëra u shtynë para skenës.
Sipas informacioneve, policia është në pritje të ekspertizës mjekoligjore për të përcaktuar shkaqet e vdekjes së tetë personave.
“Fansat e mi janë e gjithë bota për mua dhe gjithmonë dua t’u lë atyre një përvojë pozitive”, shkroi reperi 29-vjeçar në postimin e tij në Instagram të shtunën.
“Sa herë e kuptoj që diçka po ndodh, e di, e ndërpres koncertin dhe kërkoj ndihmën e policisë. Nuk mund ta imagjinoja kurrë seriozitetin e situatës”, shtoi ai./Ora News/
