Dy shkarkime në 10 minuta: Vetingu heq gjyqtaren e gjykatës së Tiranës dhe prokurorin e Shkodrës
Nga OraNews Përditësimi i fundit 28 Tetor 2021, 09:42
Një gjyqtare e Gjykatës së Tiranës dhe një prokuror i Shkodrës nuk e kaluan dot vetingun. Brenda një harku kohor prej jo më shumë se 10 minutash, sot paradite (28 tetor) në godinën e Komisionit të Pavarur të Kualifikimit u morën dy vendime për shkarkim nga detyra.
Shkarkohet gjyqtarja e Tiranes
Trupa gjuqësore e përbërë nga Lulzim Hamitaj, Genta Tafa Bungo dhe Etleda Çiftja firmosën shkarkimin nga detyra gjyqtaren e Gjykatës së Tiranës, Klorinda Çela.
Ajo vetë nuk ishte e pranishme në seancë.
Prej vitit 2013, ajo ushtronte funksionin në Gjykatën e Tiranës.
Në vitin 2014, ministri i Drejtësisë i asaj kohe kërkoi shkarkimin nga detyra të saj dhe bashkëshortit Ken Dhima për shkak të problemeve me pasurinë –por kërkesa u rrëzua nga Këshilli i Lartë i Dejtësisë.
Gjyqtari Dhima u shkarkua nga detyra më 29 korik 2021, pasi nga hetimi i KPK-së rezultoi me bilanc negativ në 12 vite si dhe me pasuri të fshehura.
Në seancë e kaluar dëgjimore me gjyqtaren Çela, KPK ngriti dyshime se gjyqtarja e Tiranës, Klorinda Çela ka fshehur dy pasuri dhe ka mungesa financiare në vlera të mëdha të burimeve të ligjshme.
Shkarkohet prokurori i Shkodrës
Trupa gjykuese e përbërë nga Roland Ilia, Pamela Qirko dhe Etleda Çiftja shkarkuan nga detyra prokurorin e Shkodrës Ermir Lelçi.
Gjatë seancës së kaluar dëgjimore prokurori u pyet dhe dha shpjegime për burimet e një apartamenti që zotëron së bashku me të atin, për problemet e konstatuara në kriterin profesional dhe gjendjen në konflikt interesi.
