Princi britanik paralajmëron katastrofë mjedisore: Samiti duhet të gjejë zgjidhje
Nga Besmira Pelushaj Përditësimi i fundit 11 Tetor 2021, 10:59
Në pritje të samitit të klimës që do të mbahet në Skoci në fund të muajit tetor, Princi i Uellsit ka komentuar protestat që po mbahen për rrezikun e ndryshimeve klimatike. Në një intervistë për BBC, Charles tha se e kupton ndjenjën e zhgënjimit, por veprime si bllokimi i rrugëve "nuk janë të dobishme".
"Unë e kuptoj plotësisht zhgënjimin, vështirësia është se si e drejtoni frustrimin në një mënyrë që të jetë më konstruktiv sesa shkatërrues," tha ai.
Duke folur në kopshtet e shtëpisë së tij në pronën Balmoral në Aberdeenshire, Charles paralajmëroi për një ndikim "katastrofik" nëse nuk ndërmerren veprime më ambicioze për ndryshimet klimatike.
"Problemi është marrja e masave në terren," tha ai. "Dua të them se do të jetë katastrofike.
Tashmë ka filluar të jetë katastrofike sepse asgjë në natyrë nuk mund t'i mbijetojë stresit që krijohet nga këto ekstreme të motit,"
I pyetur nëse ai simpatizonte me Greta Thunberg, fushatën e klimës e cila gjithashtu ka kritikuar udhëheqësit për mosveprimin, ai tha: "Sigurisht që po, po. Të gjithë këta të rinj mendojnë se asgjë nuk po ndodh, kështu që natyrisht ata do të frustrohen. Unë e kuptoj plotësisht sepse askush nuk do të dëgjojë dhe ata e shohin të ardhmen e tyre duke u shkatërruar plotësisht."
Charles nuk bërë asnjë koment kur u pyet nëse qeveria e Mbretërisë së Bashkuar po bënte mjaftueshëm për të luftuar ndryshimet klimatike. Por shtoi se konferenca e klimës në Glasgow ishte " shansi i fundit" për të trajtuar ndryshimet klimatike, duke ofruar zgjidhje që reduktojnë emetimin e karbonit në atmosferë./Ora News/
