Uragani "Henri" kërcënon SHBA, mbi 20 viktima nga përmbytjet
Nga OraNews Përditësimi i fundit 23 Gusht 2021, 10:00
Të paktën 22 persona janë konfirmuar të pajetë nga përmbytjet në shtetin amerikan të Tenesit, ndërsa janë në kërkim dhjetëra të zhdukur.
Vërshimet erdhën si pasojë e reshjeve rekord dhe fryrjes së lumenjve të shtetit juglindor.
Ujërat bllokuan rrugët, dëmtuan shtyllat e linjave telefonike duke u pamundësuar banorëve komunikimin dhe informacione mbi të afërmit.
Mes viktimave ishin binjakë, që iu shkëputën duarve të atit kur vala e vërshimeve u përplas mbi qytezën Hamfri.
"Dua ta filloj duke shprehur ngushëllimet e mia të thella për humbjen e papritur dhe tragjike të jetëve nga përmbytjet e fundit. I kam kërkuar edhe guvernatorit të ofrojë çfarëdo ndihme në këto momente të vështira," deklaroi nga Shtëpia e Bardhë presidenti Joe Biden.
Të dielën, zonat e përmbytura u zmbrapsën nga ujërat, që lanë pas makinat e shpërndara nëpër rrugë dhe shtëpi e biznese të shkatërruara.
Ndërkohë, më në veri, natyra tregoi forcën e vet me anë të uraganit Henri që edhe pse jo-fatal, kërcënoi banorët e Nju-Xhersit, Nju-Jorkut dhe shtetin e Masaçusetsit në verilindje të SHBA-së.
Vorbullat e erës me shpejtësi gati 100 km për orë krijuan dallgë 6-metërshe në disa vende. Autoritetet thanë se i druhen përmbytjeve me kalimin e uraganit në brendësi të territorit.
