Rama, Vuçiç dhe Zaev takohen online për Minishengenin, takohen në Shkup me 29 korrik
Nga Xhoi Malesia Përditësimi i fundit 29 Qershor 2021, 13:09
Edi Rama, Aleksandër Vuçiç dhe Zoran Zaev kanë zhvilluar një takim virtual ku kanë disktuar edhe njëherë për zbatimin sa më shpejtë të planit për të ashtëquajturin Schengeni i Ballkanit Perëndimor. Gjithsesi, ajo që vihet re në këtë mbledhje online të dy Kryeministrave dhe Presidentit serb është fakti se Kosova dhe dy shtetet e tjera të BP6-ës, Bosnje Hercegovina dhe Mali i Zi, mungojnë.
Ndërsa nuk ka patur asnjë sqarim për këtë çështje, në komunikatën e lëshuar për mediat, palët pjesëmarrëse bënë me dije e liderët në fjalë kërkojnë ecjen përpara me idenë e dakordësuar prej tyre. Ata kërkojnë gjithashtu një perspektivë më të qartë e të shpejtë europiane si e vetmja e ardhme. Mbledhja virtuale është parë si një koordinim përpara samitit të Ballkanit Perëndimor që do të mbahet në Berlin më datë 5 Korrik, me praninë e liderëve europianë.
Ende nuk dihet se çfarë qëndrimi do të mbajë më tej Kosova. Prishtina zyrtare nën qeverinë Hoti fillimisht e refuzoi, por më pas e pranoi nismën rajonale në bazë të marrëveshjes së Uashingtonit. Gjithësesi, mbetet për t’u parë qëndrimi i Kryeministrit Albin Kurti, i cili ka bërë disa propozime për këtë çështje.
Shqipëria e Serbia kanë hedhur një hap drejt lirisë së lëvizjes së njerëzve, ndërsa në bazë të një marrëveshjeje, qyteterët e dy vendeve tona mund të lëvizin lirisht duke patur me vete vetëm kartën e identitetit.
