Kurti: Presidenti Macron nuk më premtoi për liberalizimin e vizave
Nga OraNews Përditësimi i fundit 24 Qershor 2021, 11:36
Franca i ka kërkuar Kosovës dhe Serbisë të sillen si shtete europiane dhe t'i normalizojnë raportet për interesin e vet dhe të rajonit.
Presidenti francez, Emanuel Macron, priti të mërkurën në pallatin Elisse kryeministrin e Kosovës, Albin Kurti, për t'i përsëritur se perspektiva europiane e vendit kushtëzohet nga marrëveshja përfundimtare me Serbinë.
"Unë jam gati të investohem në kërkim të një zgjidhjeje të cilën e kam treguar më parë, por siç e dini asgjë s'ka për të qenë e mundur pa vullnetin e fortë politik të dy palëve, tuajin dhe presidentit Vuçiq. Për mua Marrëveshja e Prespës ishte si ky rast, një burim frymëzimi për vullnetin e përbashkët, prandaj edhe i ftoj Kosovën dhe Serbinë të sillen si europianë," tha Macron.
Në takimin dypalësh Makron-Kurti u trajtuan edhe problematikat e përgjithshme, si pandemia, zhvillimi ekonomik, sundimi i ligjit dhe siguria rajonale, që i shqetësojnë të dyja vendet.
Kurti pranoi se në Europë është krijuar një realitet i ri euroatlantik i cili ka nxjerrë edhe një herë në pah aleancën me SHBA-në.
Kryeministri kosovar shtoi se liberalizimi i vizave me Prishtinën mbetet një çështje ende e pazgjidhur për të cilën nuk mori premtim as në takimin me presidentin Macron.
Presidenti francez ndihmoi dy vite më parë që të ri-jetësojë procesin e dialogut Kosovë-Serbi, dhe takimi i radhës Kurti-Vuçiq pritet pas një muaji.
