Çfarë po ndodh? Faqet prestiogjoze botërore të lajmeve dalin jashtë funksionit
Nga OraNews Përditësimi i fundit 8 Qershor 2021, 13:28
Faqet kryesore të internetit në mbarë botën, nga mediet ndërkombëtare të faqet qeveritare, dolën të martën provizorisht jashtë funksionit.
Problemet filluan rreth orës 11 të paradites me kompaninë amerikane, "Fastly", e cila ofron si shërbim lidhje më të shpejta dhe më të sigurta me faqet e internetit.
Brenda pak momenteve, u bë e pamundur hapja e faqeve si "New York Times", francezja "Le Monde", britaniket "BBC" dhe "The Guardian".
Probleme me hapjen patën edhe faqet e qeverisë britanike dhe presidencës amerikane, si edhe faqja e blerjeve nga interneti, Amazon, apo e transaksioneve financiare, PayPal.
Në orën 14:41 të pasdites, kompania "Fastly" njoftoi kthimin normal të shërbimit për klientët.
"Në renë tonë informatike vërejtëm një konfiguracion të gabuar që shkaktoi çrregullime globalisht. Funksioni u çaktivizua dhe tani linja po kthehet si më parë," njoftoi kompania amerikane.
Ekspertët e fushës ngrenë shpesh shqetësimin se infrastruktura aktuale e internetit mbetet shumë e prekshme nga incidente të tilla pasi i është deleguar pak firmave nëpër botë.
Problematika e së martës u shfaq në pika të ndryshme të planetit, te faqet e Hong-Kongut, në Australi, në Brazil, në Amerikë dhe në qytetet kryesore europiane ku kompania "Fastly" ka të shpërndara pjesë të resë së vet informatike.
