"Me urdhra në WhatsApp", deputetët që morën mandatet e djegura të PD-LSI nuk njohin zgjedhjet

Nga OraNews Përditësimi i fundit 4 Maj 2021, 14:13

Opozita e re i është përgjigjur ftesës për tu mbledhur në seancë plenare për të shqyrtuar kërkesën për shkarkimin e presidentit Ilir Meta. Por në Kuvend politikanët që morën mandatet e djegura nga PD dhe LSI kanë akuzuar për manipulim dhe tjetërsim të votave në 25 prill.

Një javë pas zgjedhjeve parlamentare, Kuvendi është mbledhur sërish në seancë, duke e nisur me homazhe në nder të Bashkim Finos, i cili u nda nga jeta në 29 mars pas betejës me koronavirusin.

Të thirrur me urgjencë, 120 deputetët e mbetur pas djegies së mandateve prej PD dhe LSI do të nisin procedurën për shkarkimin e presidentit Ilir Meta, e për këtë e kanë marrë njoftimin nga nënkryetarja Vasilika Hysi.

Seanca e rradhës për këtë çështje do të zhvillohet të premten, kur Komisioni i Ligjeve do të propozojë Komisionin Hetimor për Presidentin.

Balla: Për seancën e planifikuar pasnesër do të kërkoja të shtyhej me një ditë dhe të zhvillohet ditën e premte.

Propozimi i mazhorancës nuk hasi në kundërshtime të parlamentarëve, të cilëve mandati u përfundon në 8 korrik.

Por në seancë, opozitarët e rinj, deklaruan se nuk i njohin zgjedhjet.

Gjuzi: Kujtim Gjuzi numër 1 dhe numër 5, i kanë futur një numër 12 PS.

 

Murrizi: Numëruesit tuaj mercenarë të urdhëruar në WhatsApp kanë dërguar vota me shumicë.

Por nga foltorja e Kuvendit, Taulant Balla, shigjetoi Lulzim Bashën ndërsa paralajmëroi reformë në KQZ.

Balla: U kthyem përsëri te avazi i vjetër që humbësi nuk pranon rezultatin  e zgjedhjeve. Këto zgjedhje duhet të jenë zgjedhjet e fundit që u administruan nga komisionerë politik, nga numërues politik.

Tashmë do të jetë Komisioni i Ligjeve që do të shqyrtojë kërkesën e PS për shkarkimin e Presidentit me argumentin se nuk ka përfaqësuar unitetin e kombit në fushatën elektorale.

Madje në një nga pikat thuhet se me qëndrimet e dhëna Meta ndikoi në ngjarjen e Elbasanit me pasojë 1 viktimë dhe 4 të plagosur.