Mianmar, vriten 38 protestues nga ushtria, digjen edhe fabrikat kineze
Nga OraNews Përditësimi i fundit 15 Mars 2021, 16:18
Forcat e sigurimit të Mianmarit vranë të paktën 38 vetë të dielën në një nga ditët më vdekjeprurëse që kur ushtria mori pushtetin në një grusht shteti dhe shpallën ligjin ushtarak në gjashtë zona pasi u dogjën fabrikat e financuara nga Kinezët.
Viktimat më të mëdha ishin në një periferi industriale të qytetit më të madh Yangon, ku ushtria dhe policia hapën zjarr ndaj protestuesve të paarmatosur, duke vrarë të paktën 22 persona.
Të paktën 16 njerëz u vranë në rajone të tjera rreth vendit të dielën, përfshirë në qytetin e dytë të Mandalay dhe në Bago, ku media shtetërore tha se një oficer policie kishte vdekur nga një plagë në gjoks pas një konfrontimi me protestuesit, raportoi Reuters.
Ky është polici i dytë që raportohet i vdekur në këto protesta.
Vdekjet e fundjavës e çojnë numrin e të vdekurve që nga grushti i shtetit të paktën në 126 persona.
Ambasada Kineze në Myanmar tha se disa fabrika të financuara nga kinezët u shkatërruan dhe u dogjën në zonën industriale të Yangon gjatë protestave të dielën.
"Kina e nxit Mianmarin të marrë masa të mëtejshme efektive për të ndaluar të gjitha veprimet e dhunës, për të ndëshkuar autorët në përputhje me ligjin dhe për të garantuar sigurinë e jetës dhe pasurisë së kompanive dhe personelit kinez në Mianmar," - tha ambasada kineze.
