Edhe Holanda pezullon përdorimin e vaksinës AstraZeneca
Nga OraNews Përditësimi i fundit 15 Mars 2021, 08:25
Holanda është bërë vendi i radhës që ka pezulluar përdorimin e vaksinës AstraZeneca lidhur me shqetësimet për efektet anësore të mundshme.
Qeveria holandeze tha se masa, e cila do të zgjasë të paktën deri më 29 Mars, ishte një masë paraprake, raporton BBC.
Republika e Irlandës më parë mori një vendim të ngjashëm në lidhje me raportet e ngjarjeve të mpiksjes së gjakut tek të rriturit në Norvegji.
Agjencia Evropiane e Barnave (EMA) - e cila aktualisht po kryen një rishikim të incidenteve të mpiksjes së gjakut - thotë se përfitimet e vaksinës vazhdojnë të tejkalojnë rreziqet e saj.
Danimarka, Norvegjia, Bullgaria, Islanda dhe Tajlanda tashmë kanë ndaluar përdorimin e tyre të vaksinës AstraZeneca.
Lexo edhe: Danimarka ndalon përdorimin e vaksinës AstraZeneca
Çfarë masash mori qeveria holandeze?
Në një deklaratë, qeveria holandeze tha se po merrte masa paraprake pas raporteve nga Danimarka dhe Norvegjia për efektet e mundshme anësore serioze.
"Ne nuk mund të lejojmë asnjë dyshim në lidhje me vaksinën," tha Ministri holandez i Shëndetësisë Hugo de Jonge.
"Ne duhet të sigurohemi që gjithçka është në rregull, kështu që është e nevojshme ta ndalojmë tani."
Vendimi i së dielës do të shkaktojë vonesa në programin holandez të vaksinimit.
Autoritetet kishin porositur paraprakisht 12 milion doza të AstraZeneca, me gati 300,000 vaksinime të planifikuara në dy javët e ardhshme.
