Hetuesit italianë në Pukë, verifikojnë nga afër makinën e Pecorellit dhe vendin ku u gjet e djegur
Nga OraNews Përditësimi i fundit 27 Janar 2021, 14:41
Ekspertë italianë kanë mbërritur në Shqipëri në një përpjekje për të zbardhur misterin që ka ngritur zhdukja e biznesmenit Davide Pecorelli.
Puna nisi nga Puka, atje ku mjeti që 45-vjeçari kishte marrë me qira u dogj tre javë më parë.
Pamjet në video tregojnë hetuesit italianë teksa kqyrin e fotografojnë atë që ka mbetur nga mjeti, brenda të cilës u gjetën mbetje kockore.
Dyshimet janë se ato i përkasin 45-vjeçarit, por për të thënë fjalën e fundit hetuesit italianë dhe kolegët shqiptare presin raportin e krahasimit me një familjar në Itali.
E paqartë mbetet ndërkohë çfarë ndodhi mbrëmjen e 6 Janarit në rrugën e Gjegjanit, atje ku ishte ndalesa e parë e hetuesve nga vendi fqinj, të shoqëruar nga kreu i Policisë Kriminale, Tonin Vocaj.
Ekspertët sipas burimeve ende nuk kanë dalë në përfundimin se çfarë e shkaktoi zjarrin në makinë dhe nuk mund ti japin përgigje pyetjes nësë Davide Pecorelli u vra, apo ngjarja ishte aksidentale.
Rezultatet e ekspertizave, pistat e hetimit dhe dëshmitë e marra nga prokurorët në të dy vendet u ballafaquan për rreth dy orë në një takim në prokurorinë e Pukës, pas të cilit asnjë prej palëve nuk bëri komente.
Davide Pecorelli, natën që u zhduk po kthehej nga Puka drejt Tiranës, ndërsa ishte në Shqipëri për biznes.
