Investimi i Ndraghetas, analisti sjell shembullin e Kolumbisë: Nuk ka zhvillim përmes parave të krimit
Nga OraNews Përditësimi i fundit 26 Janar 2021, 20:58
Në një intervistë për Ora News, analisti Gjergji Erebara, tha se nuk ka asnjë shans që vendi të zhvillohet përmes parave të krimit. Për ta konkretizuar këtë, ai përmendi shembullin e Kolumbisë, e cila edhe pse përmban organizata të shumta kriminale, vijon të jetë një vend jo shumë i zhvilluar.
"Nuk ka asnjë shans që një vend të zhvillohet me paratë e krimit. Kolumbia është një vend që ka shitur drogë me tonelata, në një pikë të caktuar organizatat kriminale të Kolumbisë i thanë qeverisë së vet, na fal burgun për krimet që kemi bërë dhe ne të paguajmë borxhin e jashtëm. Është njësoj sikur të ngrihet Ndragheta tani dhe të thotë, unë dua ta adoptojë Shqipërinë si vend, dua të bëhem shtetas shqiptar dhe t'i paguaj Shqipërisë 6 miliardë euro borxh të jashtëm që të na lënë rehat në Shqipëri.
Po ta keni parasysh, Kolumbia është një vend shumë i keq, njerëzit janë shumë të varfër, kriminaliteti është shumë i lartë, njerëzit kanë frikë me dalë nga shtëpia, ka grupe terroriste, ka bomba që shpërthejnë. Nuk ka asnjë shpresë për zhvillimin e vendit përmes parave të krimit, ky është koncept shumë i gabuar. Ajo që e çon përpara vendin është puna normale e qytetarëve të vend, jo paratë e krimit", tha Erebara.
