Situata jashtë kontrollit, Vasili-Ramës: Nuk trajton pandeminë, por 'trajton' oligarkët me para
Nga OraNews Përditësimi i fundit 28 Tetor 2020, 13:31
"Vendi ynë ka hyrë në një situatë të re shumë më të paparashikuar dhe sigurisht në mënyrë kaotike dhe tërësisht jashtë kontrollit".
Kështu e nisi konferencën e sotme për shtyp nënkryetari i LSI, Petrit Vasili.
Sipas tij, kryeministri Edi Rama humbi kohën për 8 muaj, ndërsa e akuzoi se po e përdor pandeminë për qëllime politike.
"Në mënyrë të drejtpërdrejt po i drejtohem kryeministrit, koha e spërdredhjeve ka mbaruar prej kohësh. Ke 8 muaj që humb kohën me budallallëqe videosh dhe me turilloj soj improvizimesh anti-shkencore, anti- epideologjike që kursen paratë për të trajtuar pandeminë dhe trajton me para gjithfarë soj tenderë sekret oligarkësh etj", u shpreh Vasili.
Duke kërkuar solidaritet mes qytetarëve, Vasili foli edhe per përdorimin e maskave, por si masa e fundit.
“Përdorini dhe maskat si një masë suplementare por pa testim, gjurmim, trajtim, diferencim të rasteve, dezinfektim, distancim fizik etj, maskat nuk janë asnjë vlerë. Janë vetëm propagandë e një njeriu që lumturohet tu vërë mijëra gjoba qytetarëve në vend që tu japë zgjidhje. Mos dëgjoni, abandononi, përbuzni fjalët e këtij sharlatani që ka hallin e karrikes së tij dhe jo pandemisë”.
