Pronësia e tokave bujqësore, kërcënojnë banorët e Shushicës: Bojkotojmë zgjedhjet
Nga OraNews Përditësimi i fundit 12 Tetor 2020, 15:00
Banorët e fshatit Mlizë në Shushicë të Elbasanit thonë se tre probleme u kanë vështirësuar jetesën.
Është vonesa e azhornimit të tokave bujqësore që thonë se po i mban peng edhe pas gati 30 viteve demokraci.
"Problemi jonë kryesor është azhornimi i tokës. Jo vetëm që nuk mund ta shesim, jo vetëm që s’e kemi tonën, por ne nuk e japim edhe me qera, sepse thjeshtë duhet një veprim noterial atje poshtë", thonë protestuesit.
Janë zotërues të tokave, por jo pronarë!
Premtimet, por mungesa e zgjidhjes thonë se i ka bërë të ndjehen të harruar nga të majtë e të djathtë.
Duke theksuar se protesta nuk është politike, paralajmëruan se fshati me 600 familje mund të bojkotojë zgjedhjet e 25 prillit.
"Ne nuk pranojmë kutitë e votimit. Do të shkojmë derë më derë ashtu siç kemi bërë fushata elektorale për partitë, tani do të bëjmë fushatë që të mos marrin pjesë në votime."
Mos kryerja e procesit të azhornimit të tokave është një problem ende pa zgjidhje përfundimtare në shumë zona të vendit.
Ndërkohë 7 nëntori është afati i fundit për fermerët për regjistrimin e tokave bujqësore të marra me ligjin 7501.
