Llukshiç: Ftesa e NATO-s sinjal i mirë për Ballkanin, do vazhdojmë reformat
Nga OraNews Përditësimi i fundit 2 Dhjetor 2015, 10:36
Zëvendëskryeministri i Malit të Zi, Igor Llukshiç, njëherësh Ministër i Jashtëm i këtij vendi, ka vlerësuar se ftesa e NATO-s, është “sinjal pozitiv për gjithë Ballkanin Perëndimor”.Këto komente ai i bëri, pasi Ministrat e Jashtëm të vendeve anëtare të NATO-s janë dakordësuar për ta ftuar Malin e Zi që të bëhet anëtare e aleancës.“Ne e urojmë Malin e Zi”, tha sot Sekretari i Përgjithshëm i NATO-s, Jens Stoltenberg, në takimin e Ministrave të Jashtëm në selinë e aleancës veriatlantike në Bruksel.Zoti Llukshiç ka premtuar se Mali i Zi do të vazhdoj reformat, përfshirë luftimin e korrupsionit dhe përmirësimin e sektorit të mbrojtjes.“Ne jemi plotësisht të vetëdijshëm se thirrja nuk është përfundim i procesit, por fillim i tij”, tha Llukshiç dhe ka shtuar se “ne jemi të përkushtuar për përmirësim të vazhdueshëm dhe punë të palodhsme, jo për t’i kënaqur të tjerët, por për ta ndryshuar shoqërinë tonë për të mirë”.Mali i Zi, vend me 600 mijë banorë bëhet anëtari i 29 i NATO-s. Zgjerimi i fundit i NATO-s ishte bërë në vitin 2009, kur u pranuan Shqipëria dhe Kroacia.Rusia, e cila për një kohë të gjatë e ka kundërshtuar zgjerimin e NATO-s, i ka tërhequr vërejtjen Malit të Zi se anëtarësimin në aleancë do ta konsiderojë si provokim.
