Danimarka vlerëson punën e ILD-së/ Metani zhvillon takime me zyrtarë të lartë në Kopenhagen për sistemin e drejtësisë
Nga OraNews Përditësimi i fundit 23 Maj 2026, 15:41
Inspektori i Lartë i Drejtësisë, Artur Metani, zhvilloi një vizitë pune dyditore në Danimarka, ku mori pjesë në disa takime me përfaqësues të institucioneve daneze dhe të Ambasadës shqiptare në Kopenhagen.
Gjatë vizitës u diskutua mbi reformën në drejtësi në Shqipëri, funksionimin e institucioneve të drejtësisë dhe forcimin e bashkëpunimit mes dy vendeve.
Në takimin me Drejtorin për Politikat Evropiane në Ministrinë e Jashtme daneze, Jakob K. Alvi, u fol për procesin e integrimit të Shqipërisë në Bashkimin Evropian dhe standardet e shtetit të së drejtës.
Metani vlerësoi mbështetjen që Danimarka i ka dhënë reformës në drejtësi në Shqipëri dhe foli për punën e Inspektorit të Lartë të Drejtësisë në lidhje me përgjegjshmërinë dhe kontrollin disiplinor në sistemin gjyqësor.
Në fokus të diskutimeve ishte edhe bashkëpunimi rajonal i ILD-së dhe përfshirja e institucionit në rrjetin evropian RESIJ, si dhe organizimi në Tiranë i konferencave rajonale me institucionet homologe të Ballkanit Perëndimor.
Nga pala daneze u bë e ditur gjithashtu se Danimarka pritet të rihapë ambasadën e saj në Shqipëri në muajt e ardhshëm.
Gjatë qëndrimit në Kopenhagë, delegacioni shqiptar zhvilloi takim edhe në Gjykatën Speciale për Ngritjen e Akuzës dhe Rishikimin, ku u diskutuan praktikat daneze për trajtimin e çështjeve disiplinore dhe standardet profesionale në sistemin e drejtësisë.
Takime u zhvilluan edhe në Ambasadën e Shqipërisë në Danimarkë me ambasadorin Sokol Dedja, ku u fol për bashkëpunimin institucional dhe lidhjet me diasporën shqiptare në Danimarkë.
Vizita u përqendrua në shkëmbimin e përvojave mes institucioneve dhe njohjen nga afër me modelin danez të funksionimit të sistemit të drejtësisë.
