Kryepolici Hitaj në përkujtimoren e 5 Majit: Dëshmorët nuk janë vetëm emra, por amanet i gjallë i sigurisë së vendit
Nga OraNews Përditësimi i fundit 5 Maj 2026, 16:49
Në ceremoninë përkujtimore të 5 Majit për Dëshmorët e Policisë dhe të Atdheut, Drejtori i Përgjithshëm i Policia e Shtetit, Drejtues Madhor Skënder Hita, u ndal te sakrifica e punonjësve të rënë në krye të detyrës dhe rëndësia e kujtesës së tyre për institucionin dhe shoqërinë.
Ai tha se kjo ditë nuk është vetëm një përkujtim formal, por një moment për t’u ndalur te ata që humbën jetën në shërbim të sigurisë publike. Sipas tij, dëshmorët nuk janë vetëm emra në pllaka përkujtimore, por njerëz që lanë pas familje, premtime dhe jetë të ndërprera në mes.
Hita vuri në dukje se çdo punonjës policie mban një përgjegjësi të madhe me uniformën që vesh, e cila nuk lidhet vetëm me detyrën për të luftuar krimin, por edhe me shërbimin ndaj qytetarëve dhe ruajtjen e besimit publik.
Në fjalën e tij, ai u ndal edhe te familjet e dëshmorëve, duke i cilësuar si pjesën më të rëndësishme të kësaj sakrifice dhe duke theksuar se shteti ka detyrim moral dhe institucional ndaj tyre.
Ceremonia u zhvillua me pjesëmarrjen e familjarëve të dëshmorëve, përfaqësuesve të institucioneve dhe partnerëve ndërkombëtarë, ku u përkujtuan punonjësit e Policisë së Shtetit të rënë në detyrë ndër vite.
