Vokshi: Në të mirë të shtetit të bëjnë një luftë të brendshme në PS si “katarsisi” i Fatos Nanos

Nga OraNews Përditësimi i fundit 30 Prill 2026, 21:46

Partia Socialiste është shndërruar në një ndërmarrje të privatizuar nga kryeministri Edi Rama, ku debati i brendshëm është shuar qëllimisht që në ditën e parë të marrjes së drejtimit prej tij.

Ky është argumenti i fortë i paraqitur gjatë debatt në emisionin “Drejt” në “Ora News”, nga Indrit Vokshi përfaqësues i lëvizjes “Nisma Kombëtare” ku theksoi se qeverisja aktuale është produkt i kësaj partie të privatizuar, e cila funksionon si një "konglomerat interesash" rreth liderit dhe klientelës së tij.

Sipas kësaj analize, kryeministri Rama e ka bërë të qartë publikisht se fenomene si Komiteti i Përgjithshëm Drejtues (KPD), një forum i dikurshëm debatesh të ashpra, nuk do të ekzistonte më, duke e transformuar partinë në një strukturë të ngjashme me ndërmarrjet shtetërore që u privatizuan nga individë të caktuar.

Në këtë kontekst, përplasjet e fundit politike, si ajo mes kryeministrit dhe ish-ministres Elisa Spiropali, shihen nga Vokshi jo thjesht si konflikte personale, por si një mundësi për të sfiduar këtë sistem të mbyllur.

Vokshi argumentoi se në një peizazh politik ku të dyja partitë e mëdha janë të privatizuara dhe kontrollohen nga liderët dhe klientelat e tyre, mbështetja për zërat kundër nuk duhet të vijë për arsye sentimentale, por "për shkaqe drejtësie".

Drejtësia, në këtë rast, nënkupton mbështetjen ndaj kujtdo që tenton të thyejë unanimitetin dhe të hapë një debat, pavarësisht motiveve pragmatiste që mund të ketë.

Duke qenë se opozita aktuale konsiderohet e paaftë për të zhvilluar një "luftë" efektive për të delegjitimuar qeverinë, Vokshi tha se shteti shqiptar ka nevojë urgjente për një "luftë të brendshme" brenda Partisë Socialiste.

Ky moment politik konsiderohet nga Vokshi, i përshtatshëm që figura të tjera brenda mazhorancës, jo vetëm zonja Spiropali, të dalin dhe të nisin një proces "katarsisi" (pastrimi) për pushtetin.

Po ashtu, Vokshi bëri një paralelizëm me të kaluarën e socialistëve, duke u bërë thirrje këtyre figurave që "t'i ngjajnë Fatos Nanos" dhe të ndërmarrin një proces të thellë pastrimi të brendshëm. Sugjerimi ishte i qartë: pasi është folur për drejtorët, tani është koha që të tregohet publikisht se çfarë kanë bërë ata, duke e çuar përplasjen në një nivel më të lartë transparence dhe llogaridhënieje.

PËR MË SHUMË NDIQNI EMISIONIN “DREJT” NË “ORA NEWS”