Salla në Dibër: Dyfishim fondesh për bujqësinë! Rreth 530 veterinerë në terren garantojnë shëndetin e kafshëve dhe sigurinë ushqimore
Nga OraNews Përditësimi i fundit 25 Prill 2026, 18:42
Ministri i Bujqësisë dhe Zhvillimit Rural, Andis Salla, zhvilloi një takim me fermerët në Dibër, në kuadër të turit “Punët e Shqipërisë”, ku prezantoi masat e reja për rritjen e investimeve në bujqësi, modernizimin e sektorit dhe arritjen e standardeve të kërkuara për tregun e Bashkimit Evropian.
Gjatë bashkëbisedimit me fermerët, ku i pranishëm ishte edhe kryeministri Edi Rama, ministri Salla theksoi se në qarkun e Dibrës është duke u zbatuar modeli i bashkimit të fermerëve përmes strukturave të përbashkëta të bashkëpunimit bujqësor (SHBB), veçanërisht në sektorin e fruta-perimeve.
Ai bëri të ditur se ky projekt mbështetet nga Ministria e Bujqësisë dhe nga Banka Botërore, ndërsa tashmë janë lidhur kontrata me subjekte që grumbullojnë dhe tregtojnë prodhimet përmes këtyre strukturave.
Salla u ndal edhe te përdorimi i teknologjisë në bujqësi, duke theksuar se në Dibër po zbatohet një model pilot me sensorë inteligjentë që monitorojnë sipërfaqet bujqësore në kohë reale.
Sipas tij, këta sensorë japin informacion për vaditjen, spërkatjen, plehërimin dhe kushtet atmosferike, ndërsa synohet që deri në muajin korrik ky sistem të shtrihet në të gjithë territorin e vendit, duke u ofruar fermerëve akses në të dhëna përmes telefonit ose aplikacioneve digjitale.
Ministri prezantoi gjithashtu risitë e skemës kombëtare të mbështetjes për bujqësinë, duke bërë të ditur se buxheti i saj është dyfishuar dhe përfshin mbështetje për një gamë të gjerë sektorësh.
Ai përmendi subvencionet për kultivimin e ullirit dhe qershisë, si dhe mbështetjen për pajisje të ndryshme që lidhen me procesin e prodhimit dhe përpunimit, duke përfshirë rrjetat, pajisjet e vjeljes dhe mjetet e ruajtjes.
Në sektorin e bletarisë, Salla tha se subvencioni për koshere është dyfishuar nga 10 mijë lekë në 20 mijë lekë, ndërsa mbështetja përfshin edhe pajisje si centrifuga për përpunimin e mjaltit, tanket e ruajtjes dhe materialet e ambalazhimit, me synimin për të garantuar sigurinë ushqimore dhe rritjen e cilësisë së prodhimit.
Ministri theksoi se mbështetja është zgjeruar edhe për blegtorinë, duke ulur pragun minimal të përfitimit nga 100 në 50 krerë, si dhe duke rritur subvencionet për bagëtitë.
Ai informoi gjithashtu për mbështetjen për ndërtimin e staneve deri në 30 mijë euro, të pajisura me sisteme sigurie, panele diellore dhe kontejnerë të lëvizshëm për ruajtjen e produkteve dhe sigurimin e kushteve optimale për kafshët.
Një tjetër masë e rëndësishme, sipas Sallës, është granti deri në 10 mijë euro për të rinjtë që duan të investojnë në bujqësi, me qëllim nxitjen e sipërmarrjes së re në zonat rurale.
Ai bëri të ditur se gjatë vitit të kaluar janë mbështetur rreth 440 aplikime në sektorë të ndryshëm, përfshirë mekanizimin bujqësor dhe agroturizmin, ndërsa këtë vit fondi i përgjithshëm arrin në 52 milionë euro.
Salla theksoi gjithashtu rëndësinë e formalizimit të shitjeve përmes faturimit, duke nënvizuar se fermerët do të përfitojnë kompensim financiar në bazë të sipërfaqes së punuar dhe të produkteve të tregtuara, proces që ka nisur nga 1 janari dhe do të vijojë deri më 31 dhjetor.
Ministri theksoi se ngritja e mëtejshme e strukturave të përbashkëta të fermerëve dhe modernizimi i prodhimit do të ndihmojnë në rritjen e konkurrueshmërisë së produkteve shqiptare dhe përmbushjen e standardeve të kërkuara nga tregu i Bashkimit Evropian.
Rreth 530 veterinerë në terren garantojnë shëndetin e kafshëve dhe sigurinë ushqimore
Në kuadër të Ditës Botërore të Veterinarisë, ministri i Bujqësisë dhe Zhvillimit Rural, Andis Salla, shprehu mirënjohjen për trupën e veterinerëve që shërbejnë në terren, duke garantuar shëndetin e kafshëve dhe sigurinë ushqimore në vend.
Ministri Salla falënderoi të gjithë veterinerët që çdo ditë janë në vijën e parë të punës, duke luajtur një rol të rëndësishëm në mbrojtjen e shëndetit publik veterinar dhe në funksionimin e zinxhirit të kontrollit ushqimor.
Aktualisht, rreth 530 profesionistë kontribuojnë drejtpërdrejt në këtë sektor jetik, duke siguruar standarde të larta në mbrojtjen e shëndetit të kafshëve dhe në garantimin e sigurisë ushqimore për qytetarët.
Ministri Salla shprehu mirënjohje të veçantë për veterinerët e AKVMB-së, veterinerët privatë dhe anëtarët e Urdhrit të Veterinerëve, për angazhimin e tyre të palodhur dhe rolin e pazëvendësueshëm që kanë në këtë fushë.
Ai gjithashtu shprehu respekt për të gjithë profesionistët që e kanë ushtruar dhe vazhdojnë ta ushtrojnë profesionin e veterinerit me integritet ndër vite.
