Nga shitëse lulesh në rrugë, viktimë trafiku, te shkrimtare e njohur: historia e pabesueshme që frymëzoi romanin e Tefta Çelajt
Nga OraNews Përditësimi i fundit 23 Prill 2026, 16:46
Një roman i ri sjell historinë rrëqethëse të një vajze, jeta e së cilës transformohet nga varfëria ekstreme dhe duart e trafikantëve, në një figurë të njohur të letrave.
Autorja Tefta Çelaj e ftuar në studion e emisionit “Epiqendër” në “Ora News”, tha se libri “Netëve kur isha pa emër” ndjek rrugëtimin e vështirë të Borës, një personazh që detyrohet të përballet me sfidat më të errëta të jetës që në fëmijëri.
E shtyrë nga kushtet e vështira familjare dhe sëmundja e së ëmës, Bora detyrohet të dalë në rrugë për të shitur lule. Të ardhurat modeste i përdor për të blerë ilaçet e nënës dhe për të siguruar mjetet e nevojshme shkollore. Sakrifica e saj arrin deri aty sa në ditën e parë të shkollës, ajo paraqitet pa libra dhe pa çantë. Pikërisht në këtë moment, lind vendimi për të punuar, duke shitur lule për të shitur shpirtin e saj, siç përshkruhet, në mënyrë që të ndihmojë familjen dhe veten.
Pavarësisht vështirësive, Bora shkëlqen në mësime. Ajo shfrytëzon çdo moment të lirë gjatë punës për të studiuar, duke u bërë një nxënëse e shkëlqyer. Megjithatë, fati e përplas me dallgë edhe më të forta. Jeta e çon drejt emigrimit, ku bie pre e trafikimit dhe përballet me kushte çnjerëzore.
Pas një kalvari të rëndë, ajo arrin të shpëtojë nga kthetrat e trafikantëve dhe i rikthehet arsimit pikërisht aty ku e kishte ndërprerë. Fuqia çliruese e shkrimit bëhet mjeti i saj për të gjetur veten, për t'u bërë “zonja e vetes” dhe për t'u shndërruar në një shkrimtare të njohur.
Historia e Borës shërben si një mesazh i fuqishëm force dhe resilience. Ajo tregon se edhe kur rrëzohesh në humnerat më të thella, ringritja është e mundur përmes forcës së brendshme, edukimit dhe pasionit. Rrëfimi synon të frymëzojë të gjithë ata që përballen me vështirësi, duke u kujtuar se forca gjendet brenda vetes, tek librat dhe tek shoqëria.
NDIQNI EMISIONIN E PLOTË “EPIQENDËR”
