HAPËSIRË/ Zbulohen në Mars elemente të reja të ndërtimit të jetës

Nga OraNews Përditësimi i fundit 22 Prill 2026, 11:07

Një rover i NASA-s ka zbuluar në Mars elemente të reja të ndërtimit të jetës, pas disa eksperimenteve kimike të paprecedenta, njoftuan sot studiuesit.

”Këto molekula organike nuk përbëjnë provë përfundimtare të jetës së kaluar në Mars”, thekson ekipi i udhëhequr nga NASA, ”pasi ato mund të kenë origjinën edhe nga ndikimet e meteoritëve”.

Por, këto të dhëna të rëndësishme për historinë e Marsit janë ruajtur në sipërfaqen e planetit për më shumë se tre miliardë vjet.

Në atë kohë, sipërfaqja e Marsit ishte e mbuluar me liqene dhe lumenj të mëdhenj të mbushur me ujë, një përbërës kyç për jetën.

”Curiosity”, një rover i NASA-s, u ul në një liqen të lashtë të quajtur Gale Crater në vitin 2012 dhe që atëherë ka kërkuar shenja jete.

Ky rover me madhësinë e një makine mbante dy tuba me një kimikat të quajtur TMAH, i aftë të zbërthente lëndën organike për të përcaktuar përbërjen e saj.

“Ky eksperiment nuk ishte kryer kurrë më parë”, tha Amy Williams, një astrobiologe që punonte në misionin ”Curiosity”.

Eksperimenti, i kryer në vitin 2020, zbuloi më shumë se 20 molekula organike.

Për disa prej tyre, prania e tyre në Mars nuk ishte konfirmuar kurrë më parë, siç është benzotiofeni, i cili, megjithatë, është gjetur tashmë në meteoritë dhe asteroide.

“Të njëjtat elementë që ranë mbi Mars si meteoritë janë të njëjtët që ranë mbi Tokë, dhe me shumë gjasa kanë siguruar blloqet ndërtuese për jetën siç e njohim ne në planetin tonë”, shpjegon Amy Williams.

”Një molekulë tjetër që përmban azot është një pararendës i strukturës përfundimtare të ADN-së”, shton ajo.

”Një mënyrë e mundshme për ta arritur këtë do të ishte të sillnim shkëmbinj marsianë në Tokë për analiza më të hollësishme”, shpjegon studiuesja.

Një tjetër rover i NASA-s, ”Perseverance”, ka mbledhur tashmë shkëmbinj për një mision të tillë, të quajtur ”Mars Sample Return”.

Pas vitesh vonesash, NASA njoftoi javën e kaluar se roveri ESA është planifikuar të niset drejt Planetit të Kuq në fund të vitit 2028.